Bethlehem VT hmaah Police kim lo

Mizoram Premier League Season 7 zan inkhel hmasa berah Mizoram Police leh Bethlehem Vengthlang FC te zanin dar 7:00 hian Lammualah an inhmachhawn dawn.

Police coach Lalbiaksanga Colney-in hlawhtling takin MPL5 khan BVT hi a enkawl tawh a, semifinal thleng turin league round-ah hmahruaitu an ni. Tun ṭumah erawh Armed Veng coach BS-a hian Police a enkawl a, BVT hi MPL-a best defender pawh lo ni tawh Lalhlimpuia'n a enkawl dawn.

Police kim lo

Mizoram Police-in recruitment an nei a, champion rinkai zinga chhal an ni. Amaherawhchu, Police player tharte hian training an la zawh loh avangin MPL season ṭantirh lamah an inlan dawn lo.

Chuvangin zanina Police kan hmuh tur hi season liam taa player-te bawk kha an ni mai dawn a, hetah hian best midfielder nominee-a tel pha

F. Zosangliana'n Chhinga Veng a zawm san tawh avangin a tel dawn lo.

Chutihrualin Police kim lo hi an la ṭha reng a, tlarhmaah F. Lalrinpuia leh Lalfakzuala an inkawp thei a, winger-ah Mizo tlan chak pahnih Lalfakzuala leh Lalsangbera te awmin midfield-ah V. Lalṭanpuia leh Lalramtharmawia te an awm.

Tlarhnungah erawh tun dinhmuna Mizoram aiawha khel pha tur an awm rih lo a, BVT tan tun hi Police laka point hmuh theihna hun ṭha a ni.

Fixture ṭha Police

Mizoram Police coach Lalbiaksanga Colney chuan, "Chak chiang a awm lo a, amaherawhchu kan fixture erawh a ṭha thawkhat viauin ka hria. BVT kan hmachhawn zawhah Electric Veng nen kan inkhel dawn a, point thum hmuh ve ve a pawimawh ang," tiin Vanglaini a hrilh.

BS-a Colney hian an tlarhnung pawh an fitness a ṭhat avangin nikum aia an ṭhat thu a sawi a, zanin hian BVT hmaah fiahin an awm ang.