Serena chak niah champion lai a tla

Serena Williams chuan Karo­lina Pliskova hnehin US Open semifinal a lut a, hetihlai hian hmeichhe singles champion lai Sloane Stephens erawh quarter­final thleng zo loin a zinkawng a tawp thung.

Nimin zing Flushing Mea­dows, New York-a quarterfinal inkhelah Serena hian bul a ṭan fuh lo a, set hmasa zawkah 4-2 in hnufual mah se set a la let thei a, seeded pariatna lakah hian 6-4, 6-3 in hnehna a chang. American nula hian Zirtawpni zing dar 4:30-ah Anastasija Sevastova a hmachhawn leh ang.

Nomawi a ngai

Kum 36 mi Serena hian nikum September thla khan a fa hmasa ber a nei a, a hming chu Olympia a ni. Fa a neih hnuah tournament khel leh nual tawh mah se hlawhtlinna a la chang leh thei rih lo.

Grand Slam vawi 23 cham­pion tawh Serena hian nomawi a chawi leh thei a nih chuan Australian hranghlui Margaret Court-i record (24 title) nih rualin major tournament champion hnem ber an ni dawn; record nih rual a chak tluk zetin fa neih hnua champion a chak tih a chiang.

Seeded 17-na Serena chuan, "Court chhunga inkhel en tura rawn kal zawng zawng mai hi ka tan an ṭha em em vek a, phurna min siamsakin dinhmun hniam zawka ka awm lai pawh khan nasa takin min au reng a ni.

"Nikum tun ang hunah kha chuan fa ka nei a ni a, kum khat liam hnuah harsatna nei loin ka inkhel leh thei tawh. Hmeichhe tan chuan harstana paltlang tur hi a tam deuh a, hei vang hian nu nih hnua hlawhtlinna chan leh hi thil awmsam a ni lo," a ti.

Stephens a tla

Season hmasa kha chuan hmeichhe singles semifinal khel chin chu American player vek an ni a, kuminah erawh chanchin a danglam ta. Latvian nula Anastasija Sevastova chuan champion lai Sloane Stephens chu 6-2, 6-3 in a hneh.

Arthur Ashe Stadium-ah khawtual nula zawk Stephens-i'n khaw lum a tuar thei lo tih a lang a, tawnhriat a nei tlem bawk; unforced errors vawi 27 neiin, tihsual a ngah chu a chak loh chhan lian tak a ni.

Seeded 19-na Sevastova tan Grand Slam semifinal a vawi khat khelhna tur a ni dawn a, a khingpui tur Serena Williams erawh player inkhel lai zinga tawnhriat ngah ber a ni thung.

Kum 28 mi Sevastova chuan, "Hliam vangin 2013 khan inkhelh hi ka chawlhsan tawh a, 2015

khan ka rawn kir ve leh chiah. Grand Slam quarterfinal vawi thum ka khelhnaah ka paltlang ve chiah a, a nuam dangdai hle.

"A nihna takah chuan thil tum tam tak ka nei hran lo, tunah chuan hrisel ṭha taka inkhelh hi ka duh ber a ni a, chumi tur chuan fimkhur takin ka inkhel. Ranking sang leh nomawi ka la sawi thei lo, tunah chuan ka khelh hmabak match pakhat chiah zel ka ngaihtuah," a ti.