UEFA Nations League ; Germany leh France an intawng nghal dawn

Europe football thuneitu sang UEFA-in friendly match ringawt khel loa international break awmze nei zawka an khelh theih dan tur a duan, UEFA Nations League chu khelh ṭan a ni dawn ta a, zanin dar 12:15-ah hian Germany leh France an intawng nghal dawn.

September 5 Vanglaini chhuak­a tarlan a nih tawh angin UEFA Nations League hi ram ṭhat dan a zirin Group A, B, C leh D-ah ṭhen a ni.

Team ṭha rual dahkhawmna Group A-ah Germany leh France inkhel tur bak intawng tur an awm loh avangin inkhel 'nghahhlelhawm' tia sawi tur dang a awm rih lo.

Hetih rual hian international friendly match pangngaiah zanin dar 12:15-ah vek hian Portugal leh Croatia an inhmachhawn dawn bawk.

Ozil tel lohna

Arsenal thiampuipa, kum 2014 World Cup-a Germany an champion theih nana player pawimawh Mesut Özil-a'n chi inthliarna lam hawi zawnga hmuhsit a tawn thu sawiin ram tana inkhelh a chawlhsan a, Germany team boruak chhe sa a ṭhat loh belh.

Ozil tel lohna Germany hi eng ang taka ṭha nge an nih ang tih hriat a châkawm a, Die Mannschaft hi Arsenal midfielder tel loin an ṭha sawt ang nge, Ozil an ngai vawng vawng zawk ang? Hunin a hril thuai dawn.

Germany hian champion lai nichungin World Cup 2018-ah khan Russia an pan a, an tawpna chu group stage a ni. An mangchhia a reh ṭan hnuah insiamṭha turin France an tawn lehnghal a ngai dawn a, insiamṭhatna nge mangchhia chhunzawmna a ni dawn, tih hi thil hriat châkawm chu a ni.

Sane a kir

Joachim Löw-a'n World Cup-ah Leroy Sane a hruai loh avangin sawisel a tawk nasa a, tun ṭumah erawh Manchester City winger a ko tawh. France lakah danglamna thlen thei tura beisei a ni ang.

Juventus midfielder Sami Khedira chu France hmachhawn tur squad-ah hian koh a ni lo a, Bayer Leverkusen midfielder Kai Havertz, Hoffenheim mid­fielder Nico Schulz leh Paris Saint Germain defender Thilo Kehrer te chu a vawi khat nan koh an ni thung.

Germany coach Löw chuan, "Sami nen hian rei tak kan titi dun a, a tan kawng a la inhawn reng thu ka hrilh. Hetihrual hian hmun awl siam ka duh thu pawh ka hrilh a, a hrethiam a ni," a ti.

Löw-a'n team thar din a tum tih a chiang a, player pa­thum ngawt a vawi khat nana a koh bakah hian World Cup-a a koh loh zingah Sane bakah Bayer Leverkusen defender Jonathan Tah leh Freiburg striker Nils Petersen te a ko.

Lloris tel loin...

France tan captain Hugo Lloris chu hliam vangin a in­hnuk­­dawk a, Tottenham Hotspur keeper aiah hian Didier Deschamps chuan Benjamin Lecomte a ko a, kum 27 mi goal­keeper hi Ligue 1-ah Montpellier tan khel mekin France-ah chuan hriat a hlawh tawh hle.

Deschamps-a'n a World Cup squad

aṭangin a ngaihdan a sawhsawn tam lo tih pholan nan Premier League player pathum Arsenal striker Ale­xandre Lacazette, Manchester United forward Anthony Martial leh Manchester City defender Aymeric Laporte a ko lo nawn.

PSG rawlthar duhawm Kylian Mbappe leh Atletico Madrid forward Antoine Griezmann-te tlarhmaah an awm avangin France an la hlauhawm reng dawn tih a chiang a, sawiselna karah Chelsea forward Olivier Giroud chuan hmun pawimawh a la chang ve zel bawk.

France coach Didier Des­champs chuan, "World cham­pion nih hi phurrit ni loin thil ropui tak a ni a, mahse chu thil chu kan in delh tir lo ang. Keini chuan kan hma hun kan thlir leh der tawh. Germany hian World Cup group stage paltlang lo mah se team ṭha tak an la ni reng a ni," tiin a sawi.

Germany squad
Goalkeepers : Manuel Neuer, Marc-Andre ter Stegen
Defenders : Jerome Boateng, Matthias Ginter, Mats Hummels, Thilo Kehrer, Joshua Kimmich, Antonio Rudiger, Nico Schulz, Niklas Sule, Jonathan Tah
Midfielders : Ilkay Gundogan, Leon Goretzka, Toni Kroos, Leroy Sane, Marco Reus, Julian Brandt, Julian Draxler, Kai Havertz
Forwards : Thomas Muller, Nils Petersen, Timo Werner
France squad
Goalkeepers : Alphonse Areola, Benoit Costil, Benja­min Lecomte
Defenders : Lucas Hernandez, Presnel Kimpembe, Benjamin Mendy, Benjamin Pavard, Adil Rami, Djibril Sibide, Samuel Umtiti, Raphael Varane
Midfielders : N'Golo Kante, Blaise Matuidi, Steven N'Zonzi, Paul Pogba, Corentin Tolisso
Forwards : Ousmane Dembele, Nabil Fekir, Olivier Giroud, Antoine Griezmann, Thomas Lemar, Kylian Mbappe, Florent Thauvin
Zanin Inkhel Tur
International friendly
Austria 12:15 AM Sweden
Netherlands 12:15 AM Peru
Portugal 12:15 AM Croatia
UEFA Nations League
League A
Germany 12:15 AM France
Czech Republic 12:15 AM Ukraine
Wales 12:15 AM Republic of Ireland