GLT leh a chhehvel

Sheffield United leh Aston Villa inkhela thil thleng avangin Premier League-a hman goalline technology siamtu HawkEye an insawifiah nghal.

HawkEye chuan, "Ball-in goalline a pel a nih chuan Goal Decision System (GDS) kalphung angin match official sana-ah a hriattir tur a ni a, amaherawhchu match official-in a dawng lo. Goal post sira camera pasarih awm te chu goalkeeper, defender leh goalpost ten an hliah avangin a hmu fuh lo. 

HawkEye Goal Line Technology system hi match 9000 chuang hman a ni tawh a, hetiang hi a la thleng ngai lo. IFAB Laws of The Game dan angin inkhelh hmain match official ten a thawh leh thawh loh an endik vek. Inkhelh chhung zawngin a ṭha a ni. HawkEye chuan Premier League, Sheffield United leh he thil avanga tuartu zawng zawng chuan thinlung takin ngaihdam kan dil e," tiin thil awm dan an sawifiah. 

Match 9000 chuanga thutlukna dik tawhtu GLT a chesual a, zawhna awm erawh eng vangin nge video assistant referee (VAR) an hman loh tih a ni. Premier League referee lam enkawltu Professional Game Match Officials Limited (PGMOL) lam chuan khelmuala thil thleng chu thil danglam bik a nih avanga VAR an inrawlh loh thu an sawi thung.

Sheffield United chuan twitter-ah, "Tak tak maw? a thawk lo maw?," tiin an ziak a, West Ham midfielder Declan Rice chuan, "Han ngaihtuah chiang te u, hei tak hi a ni lawm ni VAR awm chhan? line a pel a chiang a ni," tiin a sawi.

Stoke City player hlui Jonathan Walters pawhin, "Referee, assistant referee, Goalline Technology leh VAR pawhin a hmu lo. Premier League a rawn let leh ta, a nuam dawn e," tiin ti el takin twitter-ah a ziak a, football expert tam takin mak an tih thu a sawi bawk.

Goalline technology siamtu HawkEye meuh pawhin an ti dik lo tih a pawm a, chutihrualin football-ah thutlukna sut theih a ni tawh lo. Sheffield United an vanduai a, football khel ṭhinin Blades thil tawn hi an hriatthiam pui ang.