MPL best player-te khawiah nge an khelh dawn?

Mizoram Premier League season ruk khelh a ni tawh a, best player panga ni thei an awm. Season liam taa Chhinga Veng champion puitu R. Malsawmtluanga'n season 2-ah Chanmari FC champion puiin best player a ni tawh bawk.

Best player ni thei pali dangte chu R. Laldanmawia, Lalramchullova, F. Lalrinpuia leh Malsawmfela te an ni.

Bul tantu Sialhawk Express

Kum 2012-ah MPL khelh ṭan a ni a, Dinthar FC an champion. Sialhawk tlangval R. Laldanmawia chu Mizoram football inelna sang berah best player hmasa ber a ni kumkhua tawh ang.

India international player ni zui ta Danmawia hian Chanmari, Chanmari West leh Aizawl FC tan a khel a, I League-a AFC a champion pui hnuah East Bengal zawmin Kolkata club lianah hmun pawimawh a chang mek.

Player special MS-a

Darlawn tlangval R. Malsawm-tluanga hi India club ṭhaa khel tlak khawpa thiam a ni a, Mizoram chhuahsan tumna a neih tawk loh avangin Mizo mipuite mit titlaitu hi India ram football ngainatuten an hre tawk lo - Aizawl FC tana I League a khelh chhungin ngainatu a ngah hle thung.

Tualchhung football tan chuan MS-a hi malsawmna a ni a, thiam taka a ke vei lama ball a pe dam thlap thlap te, midang hmuh fuh loh a hmu fuh ṭhinte hi a danglamna a ni a, deadball specialist a ni bawk.

MPL2-ah MS-a'n Chanmari FC a champion pui a, MPL3-a Chanmari an champion loh chhan pawh season tawp lama MS Dawngliana nen an khelh loh vangah a ngaih theih hial.

Nikum khan Chhinga Veng FC chu inelna pathumah a champion pui a; MFA Super Cup, I Day Football leh MPL-ah R. Malsawmtluanga best player ni vek a, mimal lawmman ṭhahnem tak tun hmain a lo dawng bawk.

Player special MS-a hian tun season-ah Mizoram Police tan a khel dawn a, MPL-a club pahnih champion pui tawhtu hian chona thar a hmachhawn ang.

Chhullova a vul zel

Armed Veng tlangval Lalramchullova hi MPL ṭan hmain player langsar a ni pha lo a, FC Kulikawn-ah bul ṭanin MPL2-ah coach Malsawmkima hoin Luangmual FC final a thlenpui. Mizo coach ṭha Mala hian Aizawl FC zawmin Chhullova a hruai lut a, I League khelh tum tan a ṭha tawk loa ngaitu awm mah se khelmuala a chet dan hmangin amah ring lotute a chhanglet.

MPL3-ah Aizawl FC champion puiin best player atan thlan a ni a, Chullova hian Aizawl FC chu I League-ah a kai pui a, India ram puma champion pui zuitu zingah player pawimawh a ni bawk. Chullova hian AFC champion puitu Danmawia leh Brandon Vanlalremdika te nen East Bengal tan an khel mek.

Valpuia leh record

Republic Veng tlangval F. Lalrinpuia'n MPL hmasa berah best forward lawmman a dawng a, amaherawhchu a khelhna Mizoram Police a champion pui thei lo. MPL4-ah I League khel tur Aizawl FC-in Valpuia an lalut a, hetah hi MPL-a a chet ṭhat ber ṭum a ni.

I League club hi Spanish coach Manuel Retamero hnuaiah MPL an champon a, best player tana thlan Valpuia hian Aizawl FC hi goal 13 a khung sak a, MPL history-a season khata goal khung tam ber record niin mi pakhatin mimal lawmman a lak theih zawng zawng best player, top scorer leh best forward a hui vek.

Aizawl FC-ah season khat chauh awmin Valpuia hi Mizoram Police tan a khel chhunzawm leh ta bawk.

Sawmfela hun

Ramhlun South tlangval Malsawmfela hi talent nei ṭha zinga mi a ni a, Mizo striker ṭha ber zinga sawi a ni. MPL5-ah Chanmari FC champion puiin Sawmfela hi best player atan an thlang. Hemi ṭum hian best forward-ah thlan a ni a, top scorer Laldampuia nen goal 11 khung mah se minute tlem tea a khelh tam vang chauhin hlan a ni lo.

Season liam ta khan Sawmfela hian Chhinga Veng zawmin MFA Super Cup leh I Day Football an champion ṭumin top scorer a ni ve ve a, amaherawhchu MPL-ah erawh top scorer a la ni lo chhunzawm zel.

Police-ah best player

Best player ni thei panga zinga pahnih chu East Bengal-a khel lai an ni a, pathum dang MS-a, Valpuia leh Sawmfela te chu Mizoram Police tan an inlan dawn.

MPL-a mahni khelhna club ṭheuh champion puitu player-te hian MPL la champion lo Mizoram Police hi nomawi an chawi pui thei ang em tih zawhna chhanna hi MPL7-ah a hriat ang.

MPL Thlirletna
MPL Season 1
Champion Dinthar FC
Best Player R. Laldanmawia Dinthar FC
Top Scorer MS Dawngliana Chanmari FC (10 Goals)
Best Goalkeeper Lalawmpuia Chanmari FC
Best Defender Zothanpuia Chanmari FC
Best Midfielder Rohmingthanga FC Kulikawn
Best Forward F. Lalrinpuia Mizoram Police

MPL Season 2
Champion Chanmari FC
Best Player R. Malsawmtluanga Chanmari FC
Top Scorer Lalbiakhlua Mizoram Police (8 Goals)
Best Goalkeeper Lalawmpuia Chanmari FC
Best Defender Zothanpuia Chanmari FC
Best Midfielder Reuben Zosangpuia Luangmual FC
Best Forward MS Dawngliana Chanmari FC

MPL Season 3
Champion Aizawl FC
Best Player Lalramchullova Aizawl FC
Top Scorer Lalbiakhlua Mizoram Police FC (9 Goals)
Best Golkeeper Lalawmpuia Chanmari FC
Best Defender Emmanuel Chigozie Aizawl FC
Best Midfielder David Lalrinmuana Aizawl FC
Best Forward Malsawmfela Chanmari FC

MPL Season 4
Champion Aizawl FC
Best Player F. Lalrinpuia Aizawl FC
Top Scorer F. Lalrinpuia Aizawl FC (13 Goals)
Best Golkeeper Lalawmpuia Zo United FC
Best Defender Lalrinchhana Tochhawng Chanmari FC
Best Midfielder K. Lalṭhathanga Bethlehem VT FC
Best Forward F. Lalrinpuia Aizawl FC

MPL Season 5
Champion Chanmari FC
Best Player Malsawmfela Chanmari FC
Top Scorer Laldampuia Tochhawng Chanmari West (11 Goals)
Best Golkeeper Malsawmdawngzela Bethlehem VT FC
Best Defender Lalhlimpuia Bethlehem VT FC
Best Midfielder Lalruatfela Zote Chanmari FC
Best Forward Malsawmfela Chanmari FC

MPL Season 6
Champion Chhinga Veng
Best Player R. Malsawmtluanga Chhinga Veng FC
Top Scorer Lalfakzuala Mizoram Police FC (10 Goals)
Best Golkeeper F. Lalmuanawma Chanmari FC
Best Defender R. Laldinliana Chhinga Veng FC
Best Midfielder R. Malsawmtluanga Chhinga Veng FC
Best Forward H. Lalmuankima Aizawl FC