Harsa takin Nadal a chak
Rafael Nadal leh Dominic Thiem ten tun season US Open khelh tawh zinga inkhel hmuhnawm ber an chhawp chhuak a, darkar li leh minute 49 an inkhelh hnuah Nadal zawk a vannei. Spanish tlangval hian 0-6, 6-4, 7-5, 6-7, 7-6 a hnehna changin semifinal a in vaw kai hram.
US Open champion lai Nadal hian semifinal-ah chuan Martin del Potro a hmachhawn leh dawn, seeded pathumna Del Potro-a'n quarterfinal inkhel dangah John Isner a lo hneh ve bawk a ni.
Thawhlehna
Set nga khelh a nih tawh chuan Nadal hi chak tura ngaih a ni ṭhin. Mahse, Nadal hi kum 32 mi a ni tawh a, a tan thil a awlsam vek tawh bik lo - hnehna chang tur hian huaisenna a mamawh a, a thiamna piah lamah vanneihna a mamawh tel bawk.
A tir lamah Thiem a che fuh hmasa zawk, set hmasa berah Nadal service hi vawi thum ngawt chhuhsakin 6-0 in a la. Grand Slam match 282 a khelh tawh chinah Nadal-a'n game la miah loa set a hloh ṭum lina chiah a ni - player tam zawk ni se an tho leh tawh kher lo ang.
Tunlai player pahnih inkhel an ni bawk a, a hmuhnawm. Seeded palina Thiem lak aṭangin service ṭha bik a rawn chhuak deuh reng a, aces vawi 18 ngawt a nei. Austrian tlangval hian set hnihna leh thumna a hloh hnuah huaisen takin set lina a la thei.
Khaw lum hnuaiah inkhel boruak a sang a, set hnuhnung ber an khelh thlengin kal fal thei an awm lo. Set thumna aṭangin tie break an khel vek a, a chak zawk zawn nan pawh tie break an nei tho, Nadal-a'n lak theih tawh loh tura ngaih a vaw let, ball kang lai vawtu Thiem-a'n court pawna a vuak chhuah avangin Nadal a dingchang.
Nadal a inngaitlawm
Grand Slam vawi 17 champion tawh Nadal-a'n hnehna a chan danah a vannei tih a hai bik lo, a khingpui Dominic Thiem chu a dahsang thiam hle. Kum 25 mi Thiem-a'n aces a siam hnem bakah winners vawi 74 ngawt a vaw chhuak thei a, winners ngah ṭhin Nadal (55) ai pawhin a nei hnem zawk.
US Open champion lai Nadal chuan, "Thiem hi player ṭha bik a ni a, tunah chak lo mah se ropui zawkin a rawn kir leh ang tih ka chiang," a ti. Nadal hian a kum tam deuh tawh mah se hmalam pana a kal zel tur thu a sawi tel bawk.
Austrian tlangval Thiem chuan, "He inkhel hi chu ka hriatreng tur zinga mi a ni, a nihna takah chuan chak lo zawk awm lo mai tur niawm a ni. Mahse, semifinal lut tur zawk zawn a ngai a, ka hmuh dan chuan inkhel kha 50/50 a ni, a tawpah erawh kei aiin point khatin a hmu hnem zawk," a ti.
Del Potro a tlang
Thawhlehni zan inkhelah Martin del Potro chuan John Isner a hneh a, American mipui ten hun rei tak hnua an ram tlangvalin US Open semifinal an khel lai hmuh an beisiena chu a tawp leh ta rih.
2009 US Open champion Del Potro-a'n quarterfinal thleng turin set a hloh miah lo. Mahse, Isner lakah erawh set hmasa ber a hloh nghal a, darkar thum leh minute 31 an inkhelh hnuah erawh Argentine tlangval zawkin 6-7 (5-7), 6-3, 7-6 (7-4), 6-2 in hnehna a chang.
New York-ah hian 2006 khan Andy Roddick-a'n semifinal a thleng a, ani hnuah US mipa player thleng sang leh thei an la awm lo - kum 12 chhung zet chu a thiam pali zingah an tel phak ta lo tihna a ni.
Khawlum vangin player ṭhenkhatin inkhelh a harsa an ti a, Thawhlehni zan pawh hian khaw lum lam chu 32 degree celsius a tling. Isner-a'n service nei ṭhain, vawi 26 ngawt aces siam thei mah se tihsual a ngah; unforced errors vawi 52 ngawt neiin hun pawimawh lai takah a chesual zawkah a ṭang zel.