Pro Fight-in a huap zau dawn

Tualchhung boxing inelna ngaihhlut Pro Fight chu October 10 aṭangin neih a ni leh dawn a, kum dang aiin a huam a zau zawk tawh dawn.

Mizoram chhung mai bakah India hmarchhak state aṭangin weight hrang pangaah boxer pakhat ṭheuh an tel thei dawn a, state hrang hranga boxing hruaitute nen an state boxer ṭha an tel theih nan indawrna kalpui a ni ang.

Inelna hi R. Dengṭhuama Indoor Stadium, Mualpuiah neih a ni leh dawn a, tualchhung boxer chu kum 15 atanga 40 inkar a duh apiang tel theih a ni ang. September 10, Thawhṭanni aṭangin LPS Office-ah tel tum tan form pakhat Rs 10-a lakchhuah theih a ni dawn a, September thla chhungin thehluh thei a ni.

LPS Vision leh Mizoram Boxing Association tangkawpin hlawhtling takin Pro Fight vawi sarih a buatsaih tawh a, kum dangah quarterfinal aṭanga lawmman pawisa fai pek ṭhin chu semifinal lut chin aṭangin pek a ni tawh thung ang.

Lightfly-ah Siaha boxer NT Lalbiakkima'n kawnghren kawl mekin bantam-ah Dinthar fighter Zonuntluanga chu champion lai a ni a, light-ah Govt. Complex boxer Lalrinawma'n title humhim a tum dawn a ni.

Middleweight-ah Sawleng chhuanvawr Zarzolina'n a vawi nga nan champion a tum dawn a, weight ṭhen hrang pahniha champion thei awm chhun Tuipui fighter HC Johnkenty Vanhlimpuia'n lightheavy-ah kum thum a zawna champion tumin title fight a hmachhawn ve thung ang.

Pro Fight vawi riatnaah hian kum kal ta ang bawkin mipa weight hrang pangaah boxer-ten title an inchuh leh dawn a ni.