Messi hian UCL nomawi tam zawk a phu - Suarez

La Liga champion ni mah se Barcelona lunglawm a kim thei lo, an elpui Real Madrid-in a zawnin Champions League nomawi vawi thum ngawt an chawi tawh.

Luis Suarez chuan tun season-ah UCL nomawi chawi ngei an duh thu a sawi a, an captain Lionel Messi chuan he hlawhtlinna lian hi tun aia tam chan belh ngei a phu nia a hriat thu a sawi.

Argentina captain Messi-a'n Barcelona tan Champions League nomawi chauh pawh vawi li lai a chawi tawh, a tlem lo hle. Mahse, Catalan club hi hlawhtlinna lian chan reng duha tuihal an ni a, a bik takin an hmelma Real Madrid aia dinhmun hniam zawk anga awm chu an ngaithei lo lehzual takzet.

Uruguay international Suarez chuan, "Champions League hi player ṭha kan ni nge ni lo tih finfiahna ṭha tak a ni a, player mal dinhmun bakah club nihna fiahna hmun a ni," tiin UCL an dahsan zia a sawi.

Liverpool striker hlui chuan champion an duhzia sawi zuiin, "Tun hnai season thum chhungin beisei ang kan thleng lo, a bik takin season liam ta khan kan che chhe hle. Kuminah chuan league lama bul kan ṭan ṭhat ang bawkin European football-ah pawh beisei kan nei sang.

"Kan captain Messi hian player a nih lai ngeiin UCL nomawi chawi hnem a phu a, nikum season kan hman dan bakah World Cup aṭanga a rawn kir hnuin hlawhtlinna chang chakin a tuihal zual a ni," a ti.