MiMIR project-a tiṭhate lawmman sem Sorkarin nasa takin hma a la - Chief Minister
NEDP hnuaia intihsiakna chi khat, Mipui Mamawh Inṭawm Ruahmanna (MiMIR) hnuaia inelnaa tiṭhate hnena lawmman hlanna hun leh, 3rd. Mizoram Rahbi (Micro Start-Up Capital Competition) hawnna hun nimin khan Vanapa Hall-ah buatsaih a ni a; khuallian, chief minister Lal Thanhawla chuan, ṭhalaite'n eizawnna tlo an neih theih nan sorkarin nasa takin hma a lak thu a sawi.
Sorkarin mi zawng zawng hna an pe séng lo tih sawiin Chief Minister chuan, "Ṭhalaite mahni kea ding a, eizawnna ngêlnghet leh tlo an neih theih nan NEDP kaltlangin hma nasa taka lak a ni. Magnetic Mizoram tih hming phuahin Mizoram kan zuar a, Delhi, Mumbai, Kolkata leh Aizawlahte Road Show buatsaih a ni a, hei hian rah ṭha a chhuah. India ram mai ni lo, ram dang aṭangte pawhin sumdawng leh investor lian tak takin Mizorama hmalak an rawn dil a ni," a ti.
Lal Thanhawla chuan, Mizoramin human resource ṭha ber ṭhalaite a neih ṭhat thu sawiin, "An tana khawvel êng siam tumin sorkarin nasa takin hma a la a, Planning department-a thawkte'n ram hmangaihna rilru puin an ngaihtuahna leh theihna zawng zawng an séng a, NEDP an duang chhuak a ni. NEDP hi Mizorama development plan kan neih tawh zawng zawngah a la huap zau ber," a ti a; NEDP chu state dangte pawhin an ngaihven niin a sawi.
Mizo ṭhalaite chu NEDP bêl chianga zir chiang tura chahin CM Hawla chuan, "A bik takin Mizoram Rahbi (Micro Start Up) ruahmanna hnuaiah ṭhalaite hmakhua sut ênna tur chi hrang hrang a awm," a ti a; Mizoram Rahbi-ah mahni kea din tum tlatte tana ṭangkai tak tak a awm avangin ngaihven turin ṭhalaite a sáwm.
Chief Minister chuan, Mizoram sorkar hnuaia department hrang hrangah mi inthladah leh hlemhle tak tak tam an awm thu a sawi rualin, "Mizoram hmangaihtu, mi ṭhahnemngai leh rinawm officer kan neih ṭhat em avangin Mizoram hmabak a êng zual zel a ni," a ti.
Khualzahawm, Planning minister Lalsawta chuan, NEDP-in Mizo mipuite kawng thar a hawnsak dawn nia sawiin, "Ṭhalai lehkhathiamte'n an thiamna leh an tuinaa eizawnna tlo an neih theih nana kawng kawhhmuh chu a tum lian ber pakhat a ni," a ti a; MiMIR ruahmanna siamnaah Mizo ṭhalaite'n theihna an nei tih a lan chian thu a sawi.
MiMIR project hnuaiah hian Mizorama khua/veng hrang hrangin an district DC kaltlangin an khua/veng mamawh mipui huap leh khawtlang huao project an siam a, khua/veng 347 aṭangin project a lut.
Project luh dan chu - Aizawl district-ah 70, Lunglei district-ah 34, Siaha district-ah 49, Champhai district-ah 49, Kolasib district-ah 38, Serchhip district-ah 45, Lawngtlai district-ah 44 leh Mamit district-ah 18 a ni.
District tina project ṭha ber ṭheuhte hnenah CM-in lawmman atan lawmpuina thuziak leh Rs. 1,00,00,000 ṭheuh a hlan.
Inkhawmah hian Mizorama BPL chhungkua awm lohna Champhai district-a khaw panga - Pàmchung, Rabung, Tlángmawi, Chawngtlai leh Riangtlei khaw hruaitute hnenah an khawtlang tihmasawnna tur 'BPL-Free Villages Development Project' kaltlangin Rs. 40,00,000 ṭheuh leh lawmpuina thuziak hlan a ni bawk.
District tina MiMIR Project ṭha berte
District Pakhatna Project
Aizawl Sialsuk Sialsuk Eco-tourism Development Innovation Project
Lunglei Cherhlun 50 Kw Solar Power Plant
Siaha New Siaha 'W' Integrated Mass Transit Terminal
Champhai New Chalrang NCR Organic Pineapple Processing Plant
Kolasib Khamrang 150 Kw Power Grid Connected Solar Plant
Serchhip Thenzawl Loom Upgradation and Product Diversification
Lawngtlai Sangau Phawngpui Tourism Development Project
Mamit Reiek Organic and Eco-tourism Facilitation Centre