Zaninah intum tawk tur Chanmari FC Vs Ramhlun North
Mizoram Premier League-a vawi hnih champion tawh Chanmari FC-in zanin dar 7:00 hian tun season-a champion tuma inla ṭha Ramhlun North an hmachhawn dawn. Lammualah tualchhung football inkhel hmuhnawm thlir tur a awm ang.
Nomawi thlir liam
Chanmari FC-in kumin inelna hmasa ber MFA Super Cup final-ah Chhinga Veng FC an hmachhawn a, goal khata an chak loh avangin nomawi an thlir liam.
I Day Football khelh chhunzawm a ni a, Chanmari FC-in football hmuhnawm an lantir thei lo a. An mualpho zuina tak erawh group stage an paltlang loh lam ni loin anmahni ang bawka MPL-a vawi hnih champion tawh Aizawl FC lakah 6-0 in an chak lo.
Chanmari FC-in Mizoram winger ṭha ber ber Lalmuanzova, Vanlalbiaa Chhangte, Laldampuia leh Lalṭhasiama te kawl mah se an team balance a ṭha tawk loin a ngaih theih a, team dang an inlak ṭhat zel avangin el pha tur chuan foreigner ṭha an mamawh. Tun dinhmunah chuan nomawi thlir liam nawn thei dinhmunah an ding.
Chanmari chu
Chanmari FC-in intuai thar an mamawh a, MPL-ah thawhchhuah an tum ang. Coach Lalruatliana Sailo chuan, "MPL khel turin kan inpeih tawh a, Ramhlun North chauh pawh ni loin eng club pawh hmachhawn turin kan inpeih tawh," tiin Vanglaini a hrilh.
Amaherawhchu Chanmari tan season ṭantirha an ziahluh Lalrammuana leh MC Malsawmzuala te chhawr theihin an awm lo a, tlarhmaa an neih chhun chu Khelo India best player Lalnunzama a ni. Chanmari rawlthar duhawm Zama hian Jerry Mawihmingthanga hnung zui turin theihna a nei a, amaherawhchu chumi tithei tur chuan Jerry angin vengchhung mipui ṭawiawmna ṭha a mamawh ang.
Chanmarians hian tlar hnung lamah C. Lalrosanga, Lalmuanawma, R. Lalawmpuia leh Thomas Lalengkima te an kawl a, Rochhingpuia'n midfield a ho theih bawk avangin team ṭha tak chu an ni a, amaherawhchu nomawi em chawi pha tur chuan kim lo a awm.
Chanmari coach Tawia chuan, "Kan squad hi chhah ṭha tak han tih tur chu a ni bik lo a, pan na lai kan nei a. Chutihrualin match tina point thum beisei ngam tur chu kan ni," tiin a sawi a, foreigner an la lo ang tih a sawi theih loh.
Ramhlun North hi
Ramhlun North-in I League club Prayag United Sports Club tan pawha khel tawh Nigerian striker Waheed Adekunle an chhawr nghal dawn a, an squad thlirin Chanmari FC laka point hlawhchhuah loa lawm lo tur an ni.
Club secretary K. Lalenghluna (Maenga) chuan, "Entu mipui nei ṭha tur chuan result ṭha a ngai a, keini pawhin result ṭha leh nomawi hlawhchhuah ngei tumin player ṭha kan lalut. Chuvangin Ramhlun veng mipui zawng zawng inkhel en turin kan sawm," tiin Vanglaini a hrilh a, mipui lamin an thawhrimna hi an chhan sak ve ngei a ṭul ang.
Ramhlun North hian Calcutta Football League-a Customs tana khel mek Ghanaian midfielder John Ampong an be fel tawh a, ani erawh round 3-na aṭanga inlan hman beisei a ni a, foreigner dang an la zawng mek bawk.
Season liam ta khan Ramhlun North hi parukna chauh an ni a, MPL5-ah pasarihna an nih bawk avangin first division-a an elpui ṭhin Chhinga Veng elpha leh tur chuan result ṭha neih a ṭul dawn. Chumi tur chuan coach atan F. Lalrozara an lalut a, coach naupang viak ṭha tak hian result ṭha neihpui a tum ang.
Zanin inkhel tur hi MPL7 round 1-a intum tawk ber tura ngaih an ni a, inkhel hmuhnawm tak a nih beisei a ni.
En man leh Ṭhutna
MPL inkhel en man hi Rs 30 a ni a. School uniform ha leh kum 65 chunglam tan a thlawnin inkhel a en theih.
Tlai dar 2:00
Electric Veng: K. Kawla Stand leh S. Malsawmtluanga Stand
Aizawl FC: Zomuanthanga Stand leh Zohminga Zote Stand
Zan dar 7:00
Chanmari FC: K. Kawla Stand leh S. Malsawmtluanga Stand
Ramhlun North: Zomuanthanga Stand leh Zohminga Zote Stand