Electric Veng leh an hneh hnu Aizawl FC intum dawn!
Mizoram Premier League Season 7 chu nimin khan Lammualah khelh ṭan a tawh. Electric Veng chuan an veng chanchina MPL match hmasa ber chu vawiin tlai dar 2:00 hian Aizawl FC nen an inkhel dawn.
Electric Veng hian MPL club an nih hnua an match hmasa berah I League club hi I Day Football group match hmasa berah 2-1 in an hneh tawh a, vawiin hi an intum vawi hnihna tur a ni.
Phuba lam a ni lo
Aizawl FC coach Gift Raikhan chuan, "Football-ah hian phuba lak tur a ni lo a, a thawkrim zawk an chak ṭhin. Electric Veng kan tum hmasak ber ṭum khan MFA Super Cup an khelh ve loh avangin tu nge an nih kan hre lo a, kan inthlah dul deuh a ni ang. Tunah chuan team ṭha an ni tih kan hria a, kan theihna zawng zawngin kan khel ang," tiin Vanglaini a hrilh.
I League club hian squad an nei chhah a, Electric Veng hmachhawn tur hian defender Hmingthanmawia chiah a inhliam avangin Aizawl FC hi chak zawk tura rinkai chu an ni ngei ang.
Electric Veng beseina
Electric Veng manager Lalchhanhima chuan, "Aizawl FC hi an ṭha tih kan hai lo a, veng mipui chakna nen anni lakah hian point hlawhchhuah kan duh. MPL hi I Day Football nen a inang tawh lo a, match zawng zawnga point thum beisei vek a rem dawn lo. I League club lakah point khat kan hmuh chuan kan lawm ang a, a dawta Mizoram Police nen chuan point thum neih kan tum ang," tiin point hmuh hrim hrim an thu a sawi.
Alfred chiah
MPL club thar khingpui tur Aizawl FC hian foreigner pathum captain Alfred Kemah Jaryan bakah Mali midfielder Amadou Alou Sissoko leh Ghana forward Francis Dadzie te an lalut. State pawn player pawh Manipur defender Govin Singh leh keeper Punjab keeper Gurpreet Singh te an nei bawk.
Amaherawhchu, AFC coach Gift Raikhan chuan, "Foreigner zingah Alfred chiah chhawr theih turin a awm. Midang zawng chu inkhel turin inpeih vek mah se Mizorama football khelh hi a harsat avangin bul an ṭan lo ang," tiin tualchhung football thlir phawt se a duh thu a sawi.
Aizawl FC-in I Day Football-a bul ṭantute bawk an chhawr dawn a, Electric Veng-in I League club hi an hneh tawh avangin inrintawkna an nei ang.
Hemi belhchhah tur hian MPL club thar hian veng mipui ṭawiawmna an nei ṭha a, MPL match hmasa bera ṭantu an neih ṭhat leh theih chuan an beisei ngam loh result ṭha hi a takin a thleng nawn leh thei ang.