A thiam pali a hriam kim Djokovic hmachhawn tur chu Japan tlangval

Novak Djokovic chuan nimin zing khan Roger Federer hnehtu John Millman lakah hnehna a chang a, Serbian tlangval hian a vawi 11 nan US Open semifinal a lut. Inkhel dangah Kei Nishikori pawhin Marin Cilic hnehin quarterfinal a paltlang bawk - Djokovic leh Nishikori te hian final hmunruak an inchuh zui ang.

Zanin hian final lut tur zawnna neih chhunzawm nghal a ni dawn, world number 1 Rafael Nadal leh seeded pathumna Juan Martin del Potro ten dar 1:30-ah semifinal hmasa zawk an khel ang; Arthur Ashe Stadium-ah vek khelh a nih tawh dawn avangin a hnuah Djokovic te an inlan zui ve dawn a ni.

Hei le Djokovic

Kum 31 mi Djokovic-a'n world number 55 Millman chu darkar hnih leh minute 49 chhungin 6-3, 6-4, 6-4 in a hneh. Inkhel tir aṭangin a thunun a, quarterfinal-a Federer hnehtu Australian player Millman a che thei lo.

Flushing Meadows, New York-ah khua a lum leh a, khaw lum tuar thei lo tak Djokovic tan a harsa tura ngaih a nih laiin, buaina lian a neih phah lo. Set hnihna an khelh laiin an service an la tawn chho zel a, 4-5 a nih hnuah Millman-a service hun chiah a ni.

Set lak tumin Djokovic-a'n huaisen takin a bei, base line aṭanga ball vaw let nasa ṭhin tak nimah se a tawlh hma ngun viau. Break point vawi 13 a hmuh a chhawr ṭangkai thei lo vek! Amaherawhchu, Serbian tlangval hi dan reng theih a ni lo, a thawhrim rah hmuin set a la - inkhelh chhung zawngin a service vawi khat chiah a hloh.

A dam ta

Season hmasa khan kiu hliam vangin US Open-ah Noval Djokovic kan hmu thei lo. A kiu hi zai niin, tunah chuan a dam tawh - hliam vanga service kawnga harsatna a tawh ṭhin chu a bo tawh. Wimbledon title a lak hnuin Flushing Meadows-ah set khat chauh hloh chungin semifinal a thleng leh thei ta.

Vawi hnih a champion tawhna hmunah Djokovic-a'n quarterfnal vawi 11 a khelh a paltlang ta vek a, seeded parukna hi tun hma lama a ṭhat dan ber ang khan la khel chhuak rih chiah lo mah se Djokovic a nihna erawh a nei let leh tawh.

Grand Slam vawi 13 champion tawh Djokovic chuan, "Umpire hnenah khan boruak nuam zawk a awm theih nana hmalak a ngaih thu ka sawi a, ani chuan a ngaihven lem loh thu min hrilh. A nihna takah chuan match khat khelh chhung kawr (shirts) 10 vel ka hak a ngai a ni," a ti. Khaw lum leh boruak hnawng lutuk vanga a buaina chu a la reh lo.

Japan tlangval

'Asain tlangval ten tennis court chhungah tharum an ngah tawk lo a, an thiamna pawhin a tlin lo' tih thu awm ṭhin chu Kei Nishikori-a'n a dai dar mek zel. Japanese tlangval hian 2014 champion Marin Cilic chu 2-6, 6-4, 7-6 (7-5), 4-6, 6-4 in a hneh.

Kum 28 mi Kei Nishikori-a'n darkar li leh minute riat hnua hnehna a chan theih avangin a rilru paukhauh zia a hmuh theih a, 2014 US Open finalist hian Djokovic lakah pawh hnehna chang tur chuan beidawng loa beih hram hram theihna a mamawh ang.

Seeded 21-na Nishikori chuan, "Marin nena inkhelh hi chu a harsa ṭhin a ni, tun ṭuma mi pawh tennis match hautak tak a ni chiang hle. US Open khelh ṭan hma khan result ṭha ka nei mumal thei lo, tunah erawh kawl a eng leh ṭan ta," tiin a sawi.

Asian player zingah Nishikori hi ATP ranking nei sang thei ber a ni, 2014 kum tir lam khan palina dinhmun a luah phak; 2014, 2015 leh 2016 te khan a thiam 10 zinga tel chungin season a khar bawk a, a thlen chin a piang hi Japan mai ni lo Asia tan mellung pawimawh a ni zel.