Lianzuala goal nen India chak

Lunglei tlangval Lallianzuala Chhangte chuan India tan goal mawi bik a khung a, SAFF Championship-a India match hmasa berah Blue Tigers hi Sri Lanka lakah 2-0 in hnehna a chanpui.

India tan hian minute 35-na lekah Ashique Kuruniyan chuan goal hmahruai a khung a, second half ṭan aṭanga minute hnihna lekah Lallianzuala Chhangte chuan India goal hnihna a khung.

Delhi Dynamos forwrad hian mual vei lam sir aṭangin ṭha zetin ball a pet lut a, ball kal dan hisap sualtu Sri Lanka goalkeeper-in a chhuah - ram tan match nga a khelh tawhah goal thum a khungna a ni ta.

Blue Tigers squad-ah hian Lallianzuala bakah Jerry Lalrinzuala a awm bawk a, Bethlehem rawlthar hian bench lamah hun a hmang tluan.

India hian Pathianni zan dar 6:30-ah Maldives nen group stage match hnihna an khel leh ang a, hnehna an chang a nih chuan semifinal an lut chiang tawh ang.