Inter School TT championship

11Sports Inter School Table Tennis Championship vawi lina chu nimin aṭang khan Mizoram Table Tennis Hall, Mission Vengah khelh ṭan a ni a, inelna hi ni hnih chhung neih tur a ni ang.

Inelna hi 11Sports Company, Table Tennis Federation of India leh Mizoram Table Tennis Association ṭangkawpin an buatsaih niin, lawmman leh certificate zawng zawng pawh 11Sports leh TTFI-in an rawn tum dawn.

Inelna hi class 7 zirlai leh a hnuai lam tan team leh individual, class 8-10 tan team leh individual awmin; class 11-12 tan individual category te a awm. Championship-a che ṭhate hi National Inter School Table Tennis Championship-ah an tel ve leh thei dawn a ni.