Dawr nghak, zirlai leh internet star Denmark tan an inlan - Slovakia-in sawp
Danish Football Association (DBU) thuneitute chu an national team player-te nen inremna an neih theih loh avangin an senior player pangngai an chhawr thei lo a, Nilaini zan khan Slovakia lakah 3-0 ngawtin an mualpho.
DBU hi an senior player pangngai te nen sum chungchangah an inrem thei lo a, Tottenham Hotspur midfielder Christian Eriksen hoin player-ten inremna awm lo chuan ram tana khelh an duh lo.
Danish football thuneituten duhthlan tur an nei lo. Lungawi lo zingah hian rampawna khel player bakah Danish Superliga (an ram league sang ber) leh first division player an tel a, third division leh fustal player thlengin an ko a, an chak lo chiang hle.
Tute maw inlan?
DBU-in ram tana inkhel tura a koh player-te hi dawr nghah paha inkhel te, futsal player leh lehkha zir chunga inkhel ṭhinte an ni nawk mai! Denmark manager pangngai Age Hareide leh a a assistant Jon Dahl Tomasson te chu he team hi enkawl tir an ni lo a, Euro 92 an champion ṭuma player zinga mi John Jensen chu coach atan hian chhawr lailawk a ni.
Slovakia laka an ram captain Christian Offenberg chu third division club Avarta tana khel lai a ni a, dawr nghak hna a thawk pah bawk. Right back Simon Vollesen chu Danish fifth division-a khel lai niin zirlai a ni a, midfielder Rasmus Johansson chu third division-a khel lai niin hriat a hlawhna ber erawh freestyle footballer a nihna chu niin youtube leh instagram lama hriat hlawh tak a ni.
Hetihlai hian an khingpui Slovakia tan erawh Liverpool defender Martin Skrtel leh Napoli playmaker Marek Hamsik te an inlan a, target-ah shot 10 zet an neichungin Denmark si ban nghaktu professional futsal goalkeeper Christoffer Haagh chuan vawi sarih ngawt a dang thei a, 27% lek ball chang chunga 3-0 a an tlawm hi an vannei!
Buaina chu
Denmark senior player-te chuan Danish Football Association (DBU) nen sum chungchangah inhmuh thiam lohna an neih avangin contract thar an ziak duh lo a, DBU lam an tawlh duh bik lo.
Mahse, Slovakia lam an tum dawn hi chuan player lam an inphah hniam a, Christian Eriksen chuan, "Kan inremna hmasa ang khan thla khat atan kan contract pawhsei kan remti a, Danish football hmingchhe lutuk tur hi kan humhim a ngai a ni.
"Denmark tana khelh hi kan duh a, he buaina hi a ti punlun zawng ni lo a, reh lam a pan theih dan kan ngaihtuah a ngai a ni," tiin a sawi a, mahse DBU lam chuan an player-te duhdan hi pawm duh loin ram tana la inlan ngai lo rual khelhtir hi an thlang zawk.
Ṭhulh mai se?
Mi tam tak rilrua lo awm nghal tur chu engvangin nge an ṭhulh mai loh? tih hi a ni a, a chhanna chu Denmark hi hrem lo tawk tawh an nih avangin an tan Slovakia friendly match leh Pathianni zana Wales nena UEFA Nations League an khelh tur hi ṭhulh ngam chi a ni lo.
October 2017 khan Denmark hmeichhe team chuan Sweden nena World Cup qualifier an khelh tur chu DBU nena an inhmuhthiam loh vang bawkin an lo khel duh lo tawh a, UEFA chuan Sweden hi 3-0 a chaka puangin DBU chu £18,000 a chawitir bawk.
UEFA chuan Denmark hi a vau lawk bawk a, tun hnai kum li chhungin an match khelh tura ruahman sa reng reng an khel lo leh a nih chuan UEFA tournament reng rengah an khelh an phal dawn lo - hei vang hian senior player tel lo pawh nise infawm chawpin an khel ta zawk a ni.