Kaepernick vangin Nike-in beih a tawk

Sports thawmhnaw siam ṭhin Nike-in an advertising campaign thar bera Colin Kaepernick an hman avanga sawiselna chuan a chim sang zel a, USA president Donald Trump meuh pawh a ṭawng chhuak ve ta.

"Thinrimna leh lungawi lohna tam tak chuan Nike a thleng ta a, hetiang hian thil a kal dawn tih an ngaihtuah ang em?" tiin zawhna a siam a, USA hnam hlaa a din ve duh loh avanga sawi­sel hlawh Kaepernick leh Nike thawhhonaah a lawm lo.

Eng maw?

Kaepernick hi USA-a infiam­na ngainat hlawh leh lar tak American football player lar a ni a, August 2016 khan a club khelhna San Francisco 49ers-in pre season match an neih laiin hnam hla sak laiin zahna lantir nan a ding duh lo.

Kum 30 mi quarterback hian a hnu zelah erawh ṭhu ringawt loin hnam hla sak a nih lai hian a ṭhingṭhi ṭhin a, zahna lantir nan a ding duh lo. Kaepernick chuan, "Mi hang te chunga hleilenna lantir ṭhin hnam hla zah lantir nan hian din a ṭulin ka hre lo a ni," a ti.

Tichuan...

Kaepernick hian a thiltih avanga thlawptu tam tak a neih rualin sawiseltu pawh a ngah a, March 2017-a 49ers a chhuahsan hnuah club khelh a nei leh tawh lo bawk. Heti taka mi tam takin an sawisel laia Nike-in an campaign nan bera an hmang hi American mipui tam zawk an lungawi lo.

Nike leh Kaepernick thawh­dunna an duh lohzia lantir nan Nike infakna 'Just Do It' tih chu #JustBurnIt tih leh #Boy­cottNike tih chu social media lamah an thehdarh a, an Nike thawmhnaw an hal lai thlalak nen lam an tarlang!

Chhantu aw

Nike chuan Kaepernick hi, "A hunlaia infiammi zinga mi hneh thei ber zinga mi," tiin a chungchang an sawi a, sawiselna tam tak karah infiammi langsar tak takin Kaepernick an thlawpna thu an au chhuahpui ve thung.

Tennis star Serena Williams chuan Nike thutlukna chu huaisen thlak a tih thu sawiin, "Company dang tan entawn tur an hnutchhiah a ni," a ti a, basketball legend LeBron James chuan, "Nike thu­tlukna hi engtiklai pawhin ka pawm reng ang," tiin a sawi ve bawk.