Mohun Bagan-in neitu thar nei?

StreamCast Networks chuan India rama club hlun ber pawl Mohun Bagan-ah neitu nihna an nei thar dawn a, club secretary Anjan Mitra chuan kum 10 chhung atan inremna an neih thu a sawi.

Mitra chuan, "Hun engemaw chen chu in­dawr­na kan nei tawh a, lehkha pawimawh thehluh tur zawng zawng chu kan thehlut vek tawh a, thawh tur erawh a la awm nual. September 9-ah inremna hi ziahfel tur a ni a, inremna ang chuan club-ah neitu nihna 74% an nei dawn a ni," a ti.

Tun dinhmuna a lan dan chuan USA, England, Ireland, Malta, Kenya, Dubai, Bahrain leh India-a office nei StremCast hian a tir lamah Bagan chu sum hman tur vaibelchhe 200 an pe ang a, a hnuah vaibelchhe 150 an pek belh leh ang.

Mohun Bagan fan-te he thuthar avanga hlim taka an lam laiin club board member zinga mi Srinjoy Bose chuan thuthar a nei a, an club-in thawhpui thar a neih tur thu hi hrilh hriat a nih loh thu a sawi!

Srinjoy Bose, "Media ṭang thoin he thu hi kan lo hre ve a, club lam aṭang­in engmah hrilh hriat kan ni lo. Mahse, miin min sponsor an duh a nihte chuan keini chuan kan lawm reng a ni," a ti.

Hetihlai hian Bagan financial secretary hlui Debasish Dutta pawhin engmah hrilh a nih loh thu a sawi. Dutta chuan, "Mitra hian tun hnai thla li chunga kan account dinhmun hriat duhin min rawn bia a, neitu thar neih tur chungchang erawh engmah min hrilh lo," a ti ve bawk.