A sang pathuma tel ka phu - Griezmann

Ballon d'Or award dawng thei tur player pathum chhawpchhuah a ni tawh a, an zingah Antoine Griezmann a tel lo. France international chuan he chawimawina dawng thei tura thlan­chhuah pathum Cristiano Ronaldo, Mohamed Salah leh Luka Modric te huanga tel a phu niin a inhriat thu a sawi.

2016 khan Griezmann hi a ṭha zual pathum zingah a tel tawh a, mahse Ronaldo leh Lionel Messi te a phak lo. Kumin Ballon d'Or award hi September 24 hian London-ah sem tur a ni ang.

Season hmasa ṭha taka hmang zotu Griezmann chuan, "Ka tan chuan kum hlawhtling tak a ni, goal khung leh nomawi zawnga chhut pawhin season dang aiin a duhawm zawk. 2016 khan final vawi hnih kan khel a, nomawi kan chawi lo. Kha ti chung khan a sang pathum zingah ka tel. Kuminah erawh nomawi pathum kan chawi a, amaherawhchu thlan zinga ka tel leh si lo," a ti.

Kum 27 mi Griezmann hian season hmasa khan Atletico Madrid chu Europa League nomawi a chawipui a, nipui laiin ram leh ram inelna lian ber FIFA World Cup-ah France championpuiin; Spanish club tan UEFA Super Cup a chawi zui bawk.

Chawimawina chung­chang sawiin Griezmann chuan, "Dik lo a awm chu ka ti hran lo, mahse thil thlen dan hi a mak. A sang pathum an thlan chhuah zingah hian world champion France player an tel miah lo a ni! FIFA buatsaih a ni a, inelna lian berah kan champion chungin kan ram player an tel lo," tiin a sawi.

Griezmann hian 2014 khan Real Sociedad

aṭangin Atletico Madrid a zawm a, Diego Simeone kaihhruaina hnuaiah khawvela forward langsar leh hlauhawm berte zingah a tel tawh - Atletico tan hian match 145 a khelh aṭangin goal 80 a khung. Nipui bazar lai khan Barcelona chuan lakluh tumin bei viau mah se a club tan a rinawm zui ta zawk.