UCL khelh tum tak tak - Leicester, Chelsea leh Man Utd

Premier League-ah champion a hriat tawh a, Liverpool-in record eng zat nge an hnutchhiah dawn tih chu champion thar chanchin aṭanga hriat châkawm awmchhun a ni ta mai. Amaherawhchu Champions League khelh tum inchuh boruak erawh a 'hot' tak tak a, season liam taa nang khel zawk rawh inti ni awm fahrana an in chak loh chhawk zut ang kha a ni ta lo - pressure sangah club lian leh player nei ṭha danglamna a lang chho.

Inrinni zanah Leicester City chuan King Power Stadium-ah Crystal Palace 3-0 in an sawp a, pathumna dinhmun an luah chhunzawm zel a. Hemi rual chiaha Old Trafford-a inkhelah Manchester United-in AFC Bournemouth 5-2 in an sawp a, Ole Gunnar Solskjaer hote palina dinhmun an luah lailawk a, an awm chhung erawh a rei lo.

Chelsea-in relegate thei dinhmuna ding Watford an mikhual zui a, Frank Lampard hoten pressure nasa tak hnuaiah harsatna hranpa tawk loin 3-0 in hnehna an chang. Liverpool leh Manchester City te hnung zui turin Foxes leh Blues te palina chinah an awm lehnghal a, chutihrualin league match nga khelh tur a la awm avangin UCL khel tur hriatthiam a la har hle.

Leicester City striker chhuanvawr Jamie Vardy-a'n December 21-a Manchester City laka goal a khung hnuah a reh vang vang a, March 9-a Aston Villa an sawp ṭumin goal a rawn khung leh. English striker hi a chefuh chho dawn chiah a, Covid-19 buaina vangin inkhelh theih a ni lo. Inelna ṭan a nih hnuah match thum chhung goal khung loin hun a hmang.

Foxes goal khungtu ber Vardy a chet ṭhat loh avangin Brendan Rodgers-a hote chu team vantlang anga ngaih an ni hman. Inrinni zanah erawh Leicester City hian Kelechi Iheanacho bakah Vardy goal hnih hmangin Palace 3-0  in an hneh. Kum 33 mi Vardy ber a chet ṭhat leh tak avangin UCL khel lo tura Leicester dah ringawt a rem lo a, chutihrualin khelh hmabakah Arsenal, Tottenham leh Man Utd an awm tih hriat a ṭha.

English striker Vardy hian Premier League match 206 aṭangin goal 101 a khung tling. Goal 100 khung tura match 124 chiah mamawh Alan Shearer te nen huang khata dah rem lo mah se Vardy hian FC Halifax Town leh Fleetwood Town tan te khel hmasain Premier League a khelh meuh chuan kum 27 mi a ni tawh. Chutihrualin 'tlailam umpawng par' satliah a nih loh zia chu Premier League-ah goal 100 a khung ringawt lo a, club naran Foxes a champion pui - a ropui thlawt.

Leicester boss Rodgers chuan, "Leicester ka enkawl tirhin amah ka neih avanga ka lawm thu ka hrilh. A chhan chu goal khung thei bik a ni a, Premier League a khelh tlai ngaihtuah phei chuan goal 101 a khung hi a ropui thlawt. Kan thawk dun thei hi ka vannei hle" tiin inkhelh banah Vardy a fak.

Old Tafford-ah Cherries winger Junior Stanislas-a'n United captain Harry Maguire kap kara a khung zawhah goal hmahruai a khung a, club legend Roy Keane-a'n na taka a sawisel Maguire leh David de Gea te dem theihin an awm. Amaherawhchu United tlarhnung pawp hi tlarhma goal khung theihnain a hliah khuh a, Bruno Fernandes telna United-in goal nga an khung.

Kum 18 mi Mason Greenwood-a'n first half-ah mawi zetin a ke vei lamin a khung a, second half-ah goal khatna aia mawi mahin a ke dinglamin a khung. United rawlthar hian reserve team-a khelh lai pawhin penalty bakah freekick te hi a ke ding leh veiin a pet chhawk mai ṭhin a, player talent nei ṭha bik hian senior team-a season tluana a inlan hmasak berah goal 15 a khung tling der tawh!

Greenwood-a chet ṭhat zanah Marcus Rashford-a'n penalty aṭangin a khung a, Anthony Martial-a'n box pawn aṭangin goal kilah tak a pet lut a, Bruno Fernandes-a'n freekick aṭangin a khung bawk. Old Trafford-a inkhelah VAR-in thutlukna dik(?) siam mah se inkhel hmuhnawm laia pawh chah ngun avangin a hnawksak ta ber.

Second half ṭan aṭanga minute linaah Joshua King-a'n Cherries tan penalty a khung a, an penalty hmuh dan erawh mipui awmna inkhel ni ta se referee tana pressure belhchhah theihna theihna tur a ni. Nemanja Matic-a back pass chu tibuaitu nei lo substitute Eric Bailly kut a per a, hei referee hi Mike Dean a hmuh dan niin replay aṭanga a lan dan a dang a, penalty area a ni ngei em tih thlengin inhnialna awm thei a ni a. VAR hian Rashford-a goal khung tur a pawmsak lo a, hei erawh a offside chiah chiahah a ngaih theih thung. 

Manchester United boss Ole Gunnar Solskjaer chuan, "Goal khung tura theihna kan neih miau avangin goal kan chhuah khan kan hlauhthawn phah lo. Stretford End hmaah inkhel hmuhnawm tak phochhuah  ni a, vanduaithlak takin entu an awm lo. Entu chu awm ngat se phurna min pek belh ang a, goal kan khung belh ngei ang. Kan khelh danah ka lawm takzet," tiin a sawi.

Stamford Bridge-ah Chelsea-in mikhual Watford an nawr bet nghal a, Christian Pulisic bawk a hmuhnawm. American midfielder ball pek chu Olivier Giroud-a'n khung nghal lo mah se French striker hian minute 43-naah Ross Barkley-a ball pek chu a ke vei lamin goal kilah tak a pet lut.

Borussia Dortmund aṭanga Blues zawmtu Pulisic-a'n penalty a hlawh chuak a, Willian-a'n goal-ah a chantir. Second half-ah Watford forward Danny Welbeck a pet chu keeper Kepa Arrizabalaga-a'n a dansak a, Hornets-in goal an khung tak loah chuan Blues tan hnehna chan a awlsam phah hle.

Injury time-ah Ross Barkley-a'n angle zim tak aṭangin Chelsea goal thumna a khung a, Frank Lampard-a hote 3-0 in an chak. English manager Lampard chuan, "West Ham kha hneh ila, pathumnaah kan awm thei ang. Keimahni ngeiin kan dinhmun kan ti chhia a, palina dinhmun luah turin pressure kan nei phah. Hetiang pressure hi ngaia kan neih a ngai, a chhan chu season tluanin a harsa chho vek dawn," tiin Chelsea hian Covid-19 hnuah match liah vawi thum an chak a; Watford an hnen dan lungawithlak mah se inhliam vangin N’Golo Kante thlak a ngai. Blues ṭantuten French midfielder hi a inhliam loh hram an beisei ang. Lampard-a hote hian Crystal Palace, Sheffield United, Norwich City, Liverpool leh Wolves te an la hmachhawn dawn a, heng inkhel hian season tawpa an dinhmun a hril ang.