Atletico-in comeback ropui an lantir

La Liga champion lai Atletico Madrid chuan Inrinni zan khan Valencia lakah 2-0 a an hnufual hnuin second half-ah 3-2 in an lehthal a, goal hnuhnung pahnih hi injury time-a an khung a nih avangin Diego Simeone hote comeback hi a ropui lehzual.

Atletico hian match 21 aṭangin point 36 an hmu a, palinaah awmin hmahruaitu Real Madrid an phak lohna chu point 13 a ni. Simeone leh a hote tan nomawi humhim a harsa tawh dawn a, chutihrualin an champion nawn thei ta lo a nih pawhin season thara Champions League an khelh ngei erawh a ṭul.

Estadio Wanda Metro­politano-ah Atletico an khel ṭha lo a, first half-ah mikhual team Valencia chungnungin Yunus Musah (25') leh Hugo Duro (44') te hmangin goal an khung hmasa. Argentine manager Simeone-a'n halftime a hmang ṭha a, second half-ah Atletico team ṭha zawk an inlar.

Luis Suarez-a'n chance ṭha hlah mah se minute 64-naah Mattheus Cunha-a'n mualneitu tan siphurh a sut ṭhen. Atletico-in goal dang an khung belh leh lawk lo a, injury time minute khatnaah Angel Correa-a'n siphurh a sut zo.

Atletico an phur chhunzawm a, goal hmahruaitu khungtu Mattheus Cunha cross-shot chu Mario Hermoso-a'n (90+3') goal ruakah a khung. Inkhel hmuhnawm takah Simeone hoten 3-2 in hnehna an chang a, point thum hlu tak an hlawh chhuak.

January 21, Zirtawpni
Espanyol 1 - 4 Real Betis
January 22, Inrinni
Levante 0 - 2 Cadiz
Villarreal 3 - 0 Mallorca
Sevilla 2 - 2 Celta Vigo
Atletico Madrid 3 - 2 Valencia