Vermaelen-a'n inkhelh chawlhsan

Arsenal leh Barcelona defender hlui Thomas Vermaelen chuan inkhelh a chawlhsan a, football erawh a mangṭha nghal vek dawn lo. Belgium national team lamah coaching staff zingah a tel chhunzawm dawn.

Kum 36 mi Vermaelen hian Japanese club Vissel Kobe tan kum hnih leh a chanve a khelh hnuah a contract a hmang zo a, a contract hi pawtsei loin inkhelh chawlhsan a thlang ta zawk.

Belgium Football Federation chuan Vermaelen hi Belgium coach Roberto Martinez-a assistant zingah a tel tur thu an sawi chiang a, a inkhelh hun laia a tawnhriatte chu player naupang zawk tan a hmang ṭangkai thei ang.

Martinez chuan, "Tawnhriat a ngah a, midanglam bik a nih avangin coaching staff pawimawh tak a ni thei ang," tiin ram tana match 85 kheltu defender chungchang a sawi.

Belgium hian player ṭha tak tak nei chungin nomawi lian tham an la chawi lo. Vermaelen chuan, "Chona kan hmachhawn mek hi kan tih hlawhtlin theih ka beisei," a ti.

Red Devils hian Thibaut Courtois, Kevin De Bruyne, Eden Hazard leh Romelu Lukaku te an nei a, kumin tawp lama khelh tur World Cup atan champion an beisei ngam ang.