Inter chakna Edin Dzeka

Hun tawp dawna Edin Dzeko goal khung hmangin Inter Milan chuan Venezia 2-1 in an hneh. Serie A champion lai hian an hmelma leh elpui AC Milan lakah point ngain hma an hruai fal leh ta, match 22 ve ve an khelh tawh a ni.

Nikum nipui laia an lakluh Dzeko hian season bul a ṭan fuh a, mahse tun hnaiah a zuih. Nikum December thla hnua league goal a khung lehna hmasa ber a ni. Venezia tan Thomas Henry-a goal khung hi Nicola Barella chuan sutin, a tawpah Dzeko a inlar.

Manchester City leh AS Roma tana khel tawh Dzeko chuan, "Team tan goal khung hi chu engtik lai pawhin a lawmawm, a bik takin hun tawp dawna chakna goal khung hi chu a lawm dan tur pawh hriatthiam a harsa.

"Serie A-ah hi chuan inkhel awlsam a awm ve ngai lo, a nihna tak sawi chuan tun season chhunga kan inkhelh tawha chuan tun ṭum kha a harsat ber ṭum a ni hial mai thei," tiin a sawi.

Venezia hi table mawng­phah lama talbuai lai an ni a, point 18 chauh an la neih avangin thla thei dinhmuna ding Cagliari aia an sanna chu point hnih chauh a ni - hmahruaitu Inter nen erawh an inkhel tawk viau.

Chhuanlam siam duh ni se Venezia hian chhuanlam tur an nei ṭha. Covid-19 vangin an player pariat leh staff ṭhenkhat chu San Siro-ah hian an zin ve thei lo, an zingah hian coach Paolo Zanetti pawh a tel.

Serie A dan leh hrai siam tharah chuan, player zingah hripui kai pakua an awm tlin chauhin inkhelh tur hi sawn hlat theih a ni a.

Inrinni zan inkhel dangah Atalanta pawhin player ṭhankhat chu hripui vangin an chhawr thei bik lo a, an khingpui Lazio nen goal awm loa inhnehtawkin point khat ve veah an lungawi a ṭul.

Coach thar Alexander Blessin enkawlna hnuaiah Genoa inkhel a nung thar a, mahse goal erawh an la khung thei chuang lo - Udinese nen goal khung loin an inhnehtawk.

Serie A Results
Lazio 0 - 0 Atalanta
Inter Milan 2 - 1 Venezia
INT: Nicolo Barella 40'; Edin Dzeko 90'
VEN: Thomas Henry 19'
Genoa 0 - 0 Udinese
Verona 2 - 1 Bologna
VER: Gianluca Caprari 38';
Nikola Kalinic 85'
BOL: Riccardo Orsolini 14'