Dortmund-in champion beiseina chhi nung

Borrusia Dortmund chuan Budesliga champion beiseina chhi nung turin Inrinni zan khan Hoffenheim 3-2 in an hneh. Dortmund hian point 43 hmuin hmahruaitu Bayern Munich point thum chauhin an pha lo a, chutihrualin Bavarians-in nizana Hertha Berlin an hneh chuan an inthlauhna hi point rukah a chho leh ang.

Rhein-Neckar Arena-ah Dortmund-in bul an ṭan ṭha a, Donyell Malen cross chu Erling Haaland-a'n minute rukna lekah a khung. Hoffenheim-in first half injury time-ah Andrej Kramaric-a'n ṭha zetin a volley lut a, Croatian forward hi Hoffenheim tana goal 100 khung hmasa ber a ni.

Second half-ah Haaland, Malen leh Marco Reus ten Hoffenheim tlarhnung an ṭhiat a, Dortmund captain Reus-a'n minute 58-naah a pet goal. Minute 66-naah Hoffenheim defender David Raum-a'n an lamah ti lut a, Malen-a cross a ni. Dutch forward hi Dortmund goal thumah a inrawlh vek.

Hoffenheim-in minute 77-naah Georgino Rutter hmangin siphurh an sut ṭhen a, point hmuh beiseiin mualneitu hian nawr chhunzawm mah se goal hmaah an vannei tawk lo. Dortmund 3-2 in an chak

Dortmund tan point thum hi result ṭha ni mah se Norwegian striker Haaland chu kap bawrah hliam a neih avangin minute 63-naah an thlak. Dortmund manager Marco Rose chuan a dinhmun hre turin endik hmasak a ṭul tur thu a sawi.

Kum 24 mi Haaland hian tun season-ah league match 14 aṭangin goal 16 a khung. Haaland hi tun season-ah ṭum hnih hliam vangin a lo chawl tawh a, a awm loh lai hian Dortmund hi Champions League aṭangin an tla. Rose leh a hote tan Bundesliga-a Bayern Munich elpha tur chuan Haaland a damṭhat a ṭul ang.

Bundesliga
January 21, Zirtawpni

Eintracht Frankfurt 0 - 2 Arminia Bielefeld

January 22, Inrinni

Bayer Leverkusen 5 - 1 Augsburg

Borussia M'gladbach 1 - 2 Union Berlin

Freiburg 2 - 0 Stuttgart

Hoffenheim 2 - 3 Borussia Dortmund

Greuther Fürth 2 - 1 Mainz

Bochum 2 - 2 FC Cologne