Fergie Time-ah Rashford-a'n chakna goal a khung

Manchester United forward Marcus Rashford-a'n hun tawp hma chiahin West Ham United lakah chakna goal a khung a, Ralf Rangnick-a hoten Old Trafford-ah 1-0 a hnehna changin point thum hlu bik an hlawh chhuak.

Old Trafford-ah inkhel nung ṭha tak chhawp chhuah ni mah se minute 90 chhungin goal a lut lo. Injury time minute thum pek belh an hmang zo ṭep tihin Anthony Martial pass changtu Edinson Cavani chuan Rahsford tan a pe a, English forward hian chakna goal khung nan a hmang. Goal luh hun hi tun hmaa 'Fergie Time' an tih hun kha a ni a, goal luhna tura inrawlh player pathumte hi bench aṭanga lut vek an ni.

A entlak
Man United leh West Ham ten nung takin an khel a, amaherawhchu mual laiah an inkhel nasa, first half-ah goal zawnah an pet lo ve ve. Ralf Rangnick-a hnuaiah Man United-in a hmawr bawk an la harsat a, an buaina belhchhah turin Mason Greenwood-a'n ṭhiante siamsak mai a harsat.

First half bika United chance ṭha ber erawh Bruno Fernandes-a ball vawrhluh a ni a, Cristiano Ronaldo-a'n a tauh fuh lo chiah chiah. West Ham pawhin David de Gea tan hna an siam bik chiah lo a, match hnuhnung pahniha chakna goal khungtu Jarrod Bowen a hnawksak hle.

Second half-ah inkhel kalhmang a dang a, keeper pahnihin hna an nei ṭan. Fred-a chance ṭha neih chu Hammers keeper Alphonse Areola-a'n a dansak a, Raphael Varane pawhin corner kick aṭangin a tauh goal teuh hle.

Hammers pawhin hun tawp lamah an nawr na a, Tomas Soucek chu goal zawnah kal ngat se David Moyes-a hoten hnehna an chang thei ang. Mahse, mikhual lam duhthusamin thil a thleng thei bik lo a, goal zawna kal ṭumah keeper David de Gea a ding nghet ve tlat bawk.

A tawpah vanneihna
Ralf Rangnick-a'n chak a duh a, Rashford a luhtir hnuah goal lut lawk lo mah se minute 82-naah Cavani leh Martial te chu Fred leh Greenwood aiah a luhtir. Man United-in goal an mamawh miau a, Ronaldo pawh thlak a ni tawh lo.

Man United-in risk an lak ngam rah an seng, injury time-ah goal an khung. Ronaldo-a'n bul a ṭan a, Martial leh Cavani te inrawlh lehin Rahford-a'n a tawp a khar. Vawi khat en maiah Uruguayan forward Cavani chu offside angin lang mah se VAR hmanga en hnuah a offside lo tih hmuh a ni a, Rashford-a goal khung pawm a ni.

Man United-in point 38 an hmu a, table-ah palinaah an invawrhchho. Rangnick-a hote hi Champions League khel thei chinah awm mah se North London club pahnih Tottenham leh Arsenal ten khelhzat inangah an la lehthal thei a, an dinhmun a la him lo.

Rangnick a hlim
Manchester United manager lailawk Ralf Rangnick chuan, "Hun tawp hma chiaha chakna goal khung aia nuam a awm lo a, chak dan zawng zawnga nuam ber a ni. Goal kan chhuah lo a, ka naute an khel ṭha. Chak kan phuin ka hria a, dawhtheihna neih a ngaih chang a awm ṭhin," tiin a sawi.

Insiamṭhatna tur lai sawi zuiin Rangnick chuan, "A chang kha chuan goal-a pet loin in pass zawk ila tih ṭum ka nei. Kan insiamṭhatna tur lai a ni thei ang. Goal luhna tura substitute pathum inrawlh vekte khan minti hlim a, Villa laka point hnih kan hloh erawh uiawm viau mah se kan point hmuh chinah kan lawm," a ti.

International break a awm dawn a, Man United-in February 5 hian FA Cup-ah Middlesbrough an hmachhawn dawn. Premier League bik chu February 8-ah an khel leh chauh dawn a, Turf Moor-ah table mawngphaha awm Burnley an hmachhawn ang.

January 21, Zirtawpni
Watford 0 - 3 Norwich City
NOR : Josh Sargeant 51', 74'; Juraj Kucka 90+2' (OG)
January 22, Inrinni
Everton 0 - 1 Aston Villa
AST : Emi Buendia 45+3'
Brentford 1 - 2 Wolverhampton Wanderers
BRE : Ivan Toney 71'
WOL : Joao Moutinho 48'; Ruben Neves 78'
Leeds United 0 - 1 Newcastle United
NEW : Jonjo Shelvey 75'
Manchester United 1 - 0 West Ham United
MNU : Marcus Rashford 90+3'
Southampton 1 - 1 Manchester City
SOU : Kyle Walker-Peters 7'
MNC : Aymeric Laporte 65'