Kan dinhmun hi kan beisei phak bak a ni - Guardiola

Premier League champion lai leh hma-hruaitu Manchester City chuan Inrinni zan khan St Mary's Stadium an tlawh a, Southampton nen 1-1 in inhnehtawk mah se manager Pep Guardiola chuan champion tura an dinhmun a la ṭhat thu a sawi.

Saints-in an mikhual Man City an barakhaih a, minute sarihna lekah Kyle Walker-Peters chuan Nathan Redmond hnen aṭanga a ball hmuh chu ṭha takin a khung. City keeper Ederson dem theih a ni lo.

Man City an vannei a, Saints forward Armando Broja-a'n goal hnihna a khungah a inngai a, offside vangin pawm a ni lo. Mikhaul team an insiamṭha a, Raheem Sterling-a'n a chance ṭha neih hmasak goal zawnah a pet lo. Sterling hian keeper Fraser Forster chiah a hmachhawn hnuah keeper zawnah a pet leh bawk.

Second half ṭantirhah Man City keeper Ederson-a'n hna a nei hmasa a, Aymeric Laporte pawhin Broja goal khung tur a tackle hman. Albanian forward Broja vanneih zan a ni lo a, hnai tak aṭangin goal ban a tauh per.

Minute 65-naah Kevin de Bruyne freekick ṭha bik chu Laporte-a'n siphurh sut nan a tauh goal a, Man City-in goal dang an la beisei. Mahse, KDB-a'n goal ban a pet per a, Jesus-a'n goal ban a tauh per a, goal dang a lut tawh lo. Match 12 chhung chak zawn tawh Man City-in St Mary's Stadium-ah hnehna an chang thei lo a, 1-1 in inkhel a tawp.

Man City manager Pep Guardiola chuan, "Kan chet dan leh khelh dan thlirin kan hmabak a eng. Ball awm loh laiin player-tinin midang an pui a, an khel ṭha. A chang hi chuan ṭha taka kan khel chunga point kan hloh hi hriatthiam a har ṭhin," tiin a sawi.

Team dinhmun chungchang sawi chhunzawmin Pep chuan, "January thlaah hian kan elpui Liverpool leh Chelsea te laka point 40-a fal ka duh. Mahse, January chauh a ni a, a theih loh. Tuna ang hunah hetiang hian kan inthlauh ka ring lo a, kan beisei phak bak a ni. Chutihrualin kan inthlauhna hi zau tak a ni lo a, nomawi inchuhna hi a la tawp lo," tiin a sawi.