Lloris-a'n contract pawtsei

Tottenham captain Hugo Lloris chuan season hnih daih contract a ziak thar a, tun nipuia contract zo tur a pawhsei avangin hian kum 2024 thleng North London club tan a khel chhunzawm dawn tihna a ni.

France international Lloris hian 2012 August thla khan Lyon aṭangin Spurs hi a zawm a, player pawimawh ni chhoin captain dinhmun hial a luah. An inremna hmasa ang chuan tun thla aṭang hian club dang nen an inbe thei, mahse cham zui a tum ta zawk.

Spurs manager Antonio Conte chuan, "Hugo hi Tottenham captain a ni a, France ram captain a ni bawk, ani hi chu khawvela goalkeeper leh hruaitu ṭha bik zinga mi a ni," tiin a captain a chhuan thu a sawi.