Nadal chak niah Zverev a tla

Rafael Nadal chuan a vawi 14 nan Australian Open quarterfinal a lut, semifinal thleng tur chuan Alexander Zverev hnehtu Denis Shapovalov a paltlang leh a ngai dawn. Quarterfinal hi January 25, Thawhlehniah khelh a ni ang.

Nimin mipa singles fourth round inkhelah Nadal hian Adrian Mannarino chu straight-set hmangin a hneh a, inkhel hnuhnung zawkah Shapovalov-a'n set hloh loin seeded pathumna Zverev a vaw tla ve thung a ni.

Nadal a khawng
Kum 35 mi ni tawh mah se Rod Laver Arena chhunga Nadal che vel chu a tha a la za zek zawk hle. Seeded parukna hi set hmasa berah duhthusamin a khel lo, mahse a hnuhnung pahnihah erawh dan theih a ni lo - darkar hnih leh minute 40 chhungin 7-6 (16-14), 6-2, 6-2 in a tlang.

Nidang zawng aiin Nadal hian service a nei ṭha zawk emawni tih tur a ni, aces pawh vawi 16 lai a vaw chhuak a, a khingpui hi break point vawi hnih bak a hmuhtir miah lo, a service ṭumah point hmuh a awlsam thei hle.

Nadal chuan, "Rilru paukhauh a ngaih zia a takin ka hmu leh ta. Set khatna bik phei kha chu a awlsam lo hle, a chang hi chuan kei aia khel ṭha zawk ka hneh ṭhin avangin ka vannei takzet, tum ṭumah pawh chutiang chu ka tawng.

"Inkhel hautak takah hnehna ka chang a ni satliah lo a, quarterfinal ka luh avangin ka lawm. Ball rang leh vir em em mai hmachhawn a harsat zia pawh ka zir thar leh," a ti. Inelna neih laiah Nadal hian match li a khelh tawhah set khat chiah a la hloh.

Beiseina nung
Tennis khelhna hmun hi a inang lo - hard, grass leh clay court te an ni; hard court hi chi hran a awm bawk. Australian Open hi Nadal tan hmun ṭha leh duhthusam a ni ngai lo, mahse 2009 khan nomawi a chawi bakah round sang a thleng deuh ziah tho.

Kuminah hian amah ang bawka Grand Slam nomawi 20 chawi tawh Roger Federer chu hliam vangin a inlan lo. Champion lai leh world number 1 ni bawk Novak Djokovic chu visa hnawlsak a nih avangin a inlan thei lo bawk.

Spanish star Nadal tan major title la hnem ber nih theihna kawng a inhawng mek, nomawi chawi tur erawh chuan match thum chak a la hmabak - player ṭha hlir an nih tawh avangin hna erawh a hautak dawn, match tin chu chetsual theihna vek a ni ang.

Nadal chuan, "Champion sawi hun a la ni lo, kawng zawh tur a la thui hle. Kei chuan ka khelh hmabak pakhat bak ka ngaihtuah lawk ngam rih lo," a ti. Australian Open title a la a nih ngat chuan, an hmabak French Open atan phurna a sang zual dawn.

Hmabak Shapovalov
Olympic champion a ni thei a, Masters inelna hrang hrangah pawh a hlawhtling ṭhin. Mahse, Grand Slam an khelh apiangin Alexander Zverev hian beisei a phak lo ziah. Canadian tlangval nen darkar hnih leh minute 21 an inkhelh hnuah 6-3, 7-6 (7/5), 6-3 in a chak lo.

Seeded 14-na Shapovalov chuan, "Set thuma hnehna chan theih hi duhthusam a ni a, mahse tun ṭum atan chuan ka beisei ngam loh thil a ni. A tir aṭang khan engkim mai kha ruahmanna ang vekin a kal thei," a ti, a vawi khat nan Australian Open a khel dawn.

Kum 22 mi Shapovalov hian tun hmain Nadal hi vawi li a hmachhawn tawh a, ṭum khat chiah hnehna a chang. Shapovalov chuan, "Rafa te ang player ropui hmachhawn theih hi chu engtik lai pawhin chawimawina a tling.

"A hautak hle dawn tih chu sawi kher loh pawha chiang sa a ni, chutih rualin inelna liana player ṭha hmachhawn chu a nuam, nuamti takin ka inkhel ang," tiin a khingpui tur tawnhriat nei ṭha Nadal a hlau bik lo tih a sawi.

Inkhel dang
Inrinni khan third round khelh a ni a, champion tura rinkai Daniil Medvedev a chak laiin, seeded pangana ni phak Andrey Rublev chu service nei ṭha Marin Cilic nen set li an khelh hnuah a chak lo zawkah a ṭang.

US Open champion Medvedev-a'n Botic van de Zandschulp chu 6-4, 6-4, 6-2 in a hneh a, vawiin chawhma lam hian Maxime Cressy a hmachhawn leh ang. Russian tlangval hian 2021 khan Australian Open final a lut a, kuminah pawh champion tura rinkai a ni.

Hard court-a inkhel thiam Marin Cilic-a'n amah aia rinkai leh seeded sang zawk Rublev chu 7-5, 7-6 (7-3), 3-6, 6-3 in a hneh. US Open champion hlui, Melbourne Park-a final khel tawh bawk Cilic hian seeded pakuana Felix Auger-Aliassime a tum leh ang.

Rawlthar beisei awm zinga mi Stefanos Tsitsipas pawh a la kal zel. Australian Open semifinal vawi hnih khel tawh hian Benoit Paire chu 6-3, 7-5, 6-7 (2-7), 6-4 in a hneh a, a vawi thum nana semifinal thleng turin match hnih chak a la mamawh.