Premier League relegation battle a ngaihnawm
Premier League-ah relegation boruak a nung chho ṭan a, Norwich City-in an elpui Watford 3-0 a an hneh avangin relegation zone an chhuahsan. Newcastle United pawhin Leeds United 1-0 in an hneh a, an chunga awm Norwich point khat chauhin an pha lo.
Beisei nei Norwich
Norwich City-in manager Daniel Farke hnuaiah result ṭha an neih theih loh avangin German manager hi November 6 khan an ban a, match 11-ah point nga chauh an hmuh avangin an thutlukna hi a mak lo.
Amaherawhchu Canaries hian thutlukna mak tak an siam zui a, Aston Villa ban hlim Dean Smith chu November 15-ah an lalut. Smith hnuaiah hian point nga hmu nghal mah se match ruk a zawnin an chak lo.
Tunah erawh Everton an hneh hnuin an elpui Watford 3-0 in an hneh a, relegation zone an chhuahsan hial. Canaries hi an dinhmun la him lo mah se dahhniam theih an ni ta bik lo.
Watford erawh November 20 hnuah chak hmel an hmu tawh lo a, vawi riat an khelhah point khat chiah an hmu. October 4-a hna zawm chauh Claudio Ranieri hi a dinhmun a ṭha lo a, chutihrualin an chunga awm Norwich leh Newcastle aiin an la khel tlem zawk.
Newcastle an chak
Newcastle United-in Elland Road-ah Jonjo Shelvey freekick hmangin Leeds United 1-0 in an hneh hram. Magpies tan hian player thar Chris Wood-a'n goal a la khung lo mah se an result-ah an lawm hle.
Newcastle manager Eddie Howe chuan, "Ka player-ten club tan theihtawp an chhauh a, beiseina kan nei. Tun aia ṭha zawk hi hmuh tur a la awm. Tuna hnehna kan chan hian kan season a thlak danglam ngei ka beisei," tiin a sawi.
Magpies hian neitu thar an neih avangin ngaihven an hlawh a, thlasik bazarah player langsar ṭhahnem tak nen sawizawm ni mah se tun thlengin Wood leh Keiran Trippier te chiah an la la. English manager Howe-a hoin Newcastle-in Premier League-a inhamtan an tum ang.