Ronaldo a vul - Juve tan champion a hnai

Inrinni zan Serie A inkhelah Juventus chuan 4-1 in Torino an sawp a, Juve tan champion hnai sawt mah se a tawpa sawi hlawh ber chu Cristiano Ronaldo bawk a ni. 

Gianluigi Buffon-a'n Serie A-a a match 648-na khelin record a siam a, mahse Italian goalkeeping legend-in record a siam zana sawi hlawh ber pawh Ronaldo freekick a ni. Juventus tan chanchin lawmawm dang a la awm cheu. Serie A nomawi chawi tura an elpui ber Lazio chuan 3-0 in AC Milan an ngam lo a, an inkarah point sarih lai a awm ta. 

Milan tana goal khungtu zingah Zlatan Ibrahimovic (penalty) a tel a, kum 38 mi lai ni tawh mah se hun pawimawhah chuan innghahna tlak a la ni reng tih a pholang. 

Juventus muala inkhelah Paulo Dybala chuan minute thumna lekah goal hmahruai a khung nghal a, minute 29-naah Juan Cuadrado chuan Ronaldo siamsak aṭangin a chhunzawm ve nghal. 

Torino beiseina siamsak turin Andrea Belotti chuan first half hun pek belhah penalty hmangin si phurh sut ṭhen mah se Ronaldo hun a her chhuak a, Portuguese forward hian Juventus a pan hnua a vawi khat nan freekick hmangin a pet goal. 

Kum 35 mi forward hian 2018 khan Real Madrid aṭangin Juventus hi a pan a, freekick pettu ber a ni nghal - Torino laka a khung hi Juventus tana a freekick 43-na a ni a, a pet goal ve ta hram. Ronaldo hian a career-ah club tan freekick vawi 46-a pet goal tawh a, Real Madrid tan vawi 32 pet goal-in Manchester United tan vawi 13 ngawt freekick aṭangin a lo chhuih lut tawh bawk. 

Juventus-in goal khung pui mamawh lo mah se Torino defender Koffi Djidji chuan hun tawp nan minute thum chauh a awm tawh tihah an lamah a ti lut zui a, Juventus an chak chiang hle. 

Ronaldo-a'n freekick aṭanga goal a khung khan tun season Serie A-a goal 25 a khungna chiah a ni a, heti zat goal khung tur hian league match 26 bak a mamawh lo - inelna hrang hrangah match 38 khelin goal 29 a khung tawh. 

Juventus tan hian Omar Sivori chuan 1960-61 season khan Serie A-ah goal 25 a khung a, Sivori hnua Juve tana Serie A season khata goal 25 khung leh thei hmasa ber chu Ronaldo hi a ni. 

Ronaldo hian goal a la khung dawn chauh niin a lang a, season hnih lek chhungin Juve tana Filippo Inzaghi, Alessandro Del Piero, Gonzalo Higuaín leh David Trezeguet te tih theih loh a ti fel der. 

Kum 42 mi Buffon-a'n Juventus tan goal a veng a, Serie A match 648-a khelhna niin Italian top flight league-a inlan tam lamah AC Milan legend Paolo Maldini record chu a khum ta. 

Buffon hian Parma aṭanga a career ṭanin kum 2001 thleng kha a khel a, league match 168-ah a inlan hman. Kum 2001 khan Juve panin 2018 thleng khan a khel a, Serie A match 472 a khelhsak. Season hmasa khan Ligue 1 lamah kalin Paris Saint-Germain a zawm a, league match 17-a khelhsak hnuah Juve-ah bawk hian a kir - tun season-ah league match riat khelin record a siam ta. 

Buffon hian PSG-a match 17 a khelh nen European top five league-a inlan hnem ber dinhmun a chelh mek bawk a, Championship lama West Brom tana khel mek Gareth Barry chuan Premier League-a khelh laiin match 653-a khel hman a ni. 

Lazio-in Serie A nomawi an beiseina chhi nung turin chak an mamawh a, mahse an mualah rin loh takin mikhual AC Milan chu 3-0 ngawtin an ngam lo. Milan tan hian Hakan Calhanoglu, Ibra leh Ante Rebic te chuan goal khat ṭheuh an khung. 

Milan tan Calhanoglu-a'n ṭha zeta an goal hmahruai a khung hnuah Ibrahimovic hian penalty aṭangin an goal hnihna a khung ve leh a, tun season league match 10-a khelha goal li a khungna a ni. Ibra hian December khan Milan hi season tawp thleng atan zawm turin inremna a siampui a, kum 38 mi nichunga European top league-a goal a la khung zak zak thei hian a theihna sanzia a pholang. May thla tawp lam khan Ibra hian hliam neiin season a hman tluan theih loh hlauhthawnna a awm hman a, mahse beisei aia dam chakin goal a khung leh ta - inelna hrang hrangah match 12 khelin goal nga a khung tawh. 

June 4, 

Inrinni Zan

Juventus 4 - 1 Torino

JUV: Paulo Dybala 3'; 

Juan Cuadrado 29'; Cristiano Ronaldo 61; 

Koffi Djidji 87' (OG)

TOR:  Andrea Belotti 45+6' (P)

Sassuolo 4 - 2 Lecce

SAS: Francesco Caputo 5'; Domenico Berardi 63' (P); Jeremie Boga 78'; 

Mert Müldür 83'

LEC: Fabio Lucioni 27'; Matteo Mancosu 67' (P)

Lazio 0 - 3 Milan

MIL: Hakan Calhanoglu 23'; Zlatan Ibrahimovic 34' (P); Ante Rebic 59'

––––––––––––––––––––––––––––––––––––––––––––––––––––––––––––––––––––

*Zaninah Serie A inkhel a awm dawn lo