India tan Remsiami'n goal a khung

Asia Cup hockey tournament khelh laiah India chuan Zirtawpni zan khan an match hmasa ber an khel a, an khingpui Malaysia chu 9-0 in an sawp. Champion lai India tan Lalremsiami Hmar chuan goal khat a khung.

Japan rama inelna neihah captain Rani Rampal awm lo mah se India hian goal khung kawngah harsatna an nei lo. Vandana Katariya, Navneet Kaur leh Shamila Devi ten goal hnih ṭheuh an khung bakah Remsiami leh Monika ten an khung bawk.

Indian hian an match hnihna atan nizan khan a thlengtu Japan an hmachhawn a, result kan hre hman lo. Zanin dar 8:30 hian an pool match hnuhnung atan Singapore an hmachhawn zui leh nghal dawn a ni.

India chief coach Janneke Schopman chuan, "Match ṭha tak kan khel, kan khingpuite kha team ṭha ni mah se kawng tinrengin kan thunun thei. A bul kan ṭan fuh ang hian a hmawr pawh bawk fuh ila tih hi duhthusam a ni," tiin a sawi.

Inelna hi nomawi inchuhna a nih bakah FIH Women's World Cup khel tur zawnna a ni a, a pawimawh dan a thuah hnih hle. Inelna hnuhnung berah khan India hian Japan 2-1 a hnehin hlawhtlinna an lo chang tawh a ni.