Francis Ngannou a chungnung

Nimin zing khan Anaheim, California-ah UFC 270 neih a ni a, mipui ngaihven tak Francis Ngannou chuan Ciryl Gane chu unanimous decision (48-47, 48-47, 49-46) hmanga hnehin heavyweight title a hreng.

Kum 35 mi Ngannou hi a tir lamah chuan a che fuh vak lo, dinhmun hniam zawk tur niin a lang hman. Mahse, wrestling thiam a nihna leh a kutthlakna tak a hmang ṭangkai a, a tawpah chuan chungnung zawk a ni.

Cameroon pa rothap Ngannou chuan, "Chawlhkar thum liamta khan ka khup a hliam, duhthusama ṭhain inbuatsaihna kal vek thei lo mah se a ṭha ber ka nihna ka pho lan theih avangin ka lawm," a ti a, huphurh a nei lo hle.

Deiveson Figueiredo pawhin UFC flyweight title la let turin Mexican tlangval Brandon Moreno chu unanimous decision (48-47, 48-47, 48-47) hmangin a hneh ve bawk.