Azarenka hnehtu Krejcikova

Australian Open vawi hnih champion tawh Victoria Azarenka chu Barbora Krej­cikova hneh loin a tla a, fourth round inkhel dangah seeded pangana Maria Sakkari pawh Jessica Pegula hneh loin a zinkawng a tawp ve bawk.

Nimin inkhelah Azarenka hi French Open champion Krejcikova lakah 6-2, 6-2 in a chak lo a, 2012 leh 2013 champion hian quarterfinal pawh thleng zo loin a puanthuah a tel a ngai. Azarenka a tlak leh takah chuan mipa leh hmei­chhe player zingah Rafael Nadal chauh champion hlui la dam awmchhun a ni.

Belarus nula Azarenka hian inkhelh laklawh laiin medical time out a lak a ngai, a nghawng na chu enkawl lailawk a ni a, nidanga ṭha taka a khelh ang khan a khel chhuak thei lo - a khingpui player hi a chesual duh lo bawk.

Czech player Krejcikova hian inelna kal laiah set a la hloh miah lo a, player khel ṭha tluang berte zinga mi a ni. Quarterfinal-ah chuan player ṭha Paula Badosa hnehtu Madison Keys nen an inhmachhawn leh dawn a, straight set a chak a harsa tawhin a rinawm.

Kum 26 mi Krejcikova chuan, "Rod Laver Arena-a inkhelh hi tennis player dangte pawhin an duhthusam a ni a, stadium hmingthang takah player ṭha bik ka hneh theih hi chu duhthusam a thleng dik," tiin a sawi.

Tualchhung nula Barty chuan nimin tlai khan Amanda Anisimova 6-4, 6-3 in a hneh ve bawk a, seeded pakhatna hian a hma a ding apiang a sawp chho zel a ni ber mai; khel ṭha tluang tak Barty hma a din hi thil châkawm lo tak a ni ang.

Kum 25 mi Barty chuan, "A nihna tak sawi chuan tun hnai kum hnih chhung chu mitin tan a harsa vel vek a, tuna inkhel entu an han awm leh thei ta ringawt pawh hi thil lawmawm a ni. Fans tel lo chuan engmah lo mai kan ni a, anni tel hian tournament pawh a nuamin a famkim," a ti.