US Open khelh tum Thiem

Dominic Thiem chuan coronavirus vanga buaina karah pawh US Open khelh ngei a tum a, inelna buatsaihtu lam chuan thutlukna dik an siam niah a ngai. New York khawpuiah inkhel tura zin luh ngei a tum.

United States hi Covid-19 kai tam berna ram a ni a, nimin tlai thleng khan hri kai hi mi 2,935,993 an tling tawh. US-ah pawh New York hi hri leng tamna hmun a ni a, tennis inelna lian khelhna tur hmun a nih avangin sawi a hlawh.

World number 3 Thiem chuan, "US Open khelh ngei ka tum, thutlukna erawh July thla chawhma lamah ka siam fel ang. Ruahmanna fel tak a awm vek avangin hlauh tur a awm loah ka ngai," a ti.

Tennis player zawng zawng hi US an pan hma leh a thlen hnuah coronavirus an kai em tih endik vek an ni dawn. Player leh coach-te hi mahni duh thu thuin an kal darh thei dawn lo a, thlenna tur hmun bik siamsak an ni ang.

Kum 26 mi Thiem hi an ram Austria-ah hri leng a hluar ve loh avangin training pawh ṭha takin a nei thei a. Thla hmasa khan world number 1 Novak Djokovic buatsaih Adria Tour-ah a inlan a, player paliin hripui kai mah se ani chuan a kai ve lo.

Tun hnai mai khan American tennis player Frances Tiafoe chu Covid-19 a kai tih hmuhchhuah leh a ni a, kum 22 mi hian natna lang chhuak nei lem lo mah se social media lamah hri a kai thu hi a puang.