Real tan point khat, Barca an chak

La Liga-ah hmahruaitu Real Madrid-in an mual Santiago Bernabeu-ah Elche 2-2 in an draw hram a, FC Barcelona-in khualmualah hun tawp dawna Frenkie de Jong goal hmangin Alaves 1-0 in an hneh thung. Los Blancos-in point 50 hmuin hmahruaitu an ni chhunzawm a, an hnuaia awm Sevilla nen an inkarah point li chauh a awm.

Xavi kaihhruai Barcelona-in point 35 an hmu a, panganaah awmin an chunga awm Atletico Madrid point khatin an pha lo. Barca leh Atletico te hi hmahruaitu Real Madrid aiin point khatin an khel tlem a, chutihrualin an inkarah point 10 chuang a awm tih hriat a ṭha thung.

Real an tlo
Real Madrid-in bul an ṭan chhe lo a, Karim Benzema-a'n box chhungah ṭha takin chance insiam mah se Elche keeper-in a dansak. Darkar chanve ral hnuah Vinicius Jr-a'n penalty a hlawh chhuak a, Benzema-a'n goal zawnah a pet lo. French striker hian Real Madrid tana penalty a hlahna hmasa ber a ni.

Minute 42-naah Elche zawkin goal an khung a, vei lam aṭanga Chaves de la Torre cross chu Lucas Boye-a'n a tauh goal ṭha hle. Mikhual team bawkin second half-ah goal an khung a, minute 76-naah Boye ball pass ṭha chu Pere Milla-a'n ṭha zetin a khung.

Casemiro-a'n crossbar a tauh per a, Real an vanduai turah a ngaih theih. Amaherawhchu Real an vannei a, Milla handball vangin penalty an hmu. Benzema an lakchhuah tawh avangin Luka Modric-a'n a pet a, Croatian midfielder-in La Liga-a a penalty hmasa ber a khung.

Injury time-ah Real Madrid-in siphurh an sut zo a, Vinicius Jr cross chu defender Eder Militao-a'n chiang takin a tauh goal. Goal dang a lut tawh lo a, 2-2 in inkhel a tawp.

Barca tan Frenkie
Barcelona-in Spanish Super Cup semifinal-a Real Madrid an hneh loh hnuin Copa del Rey-ah Athletic Bilbao hneh loin an tla. La Liga-ah Barca-in Mendizorroza-ah Alaves an tlawh a, ṭum dang ang thoin result ṭha hlawhchhuah an harsat.

Team pahnihin chance ṭha an insiam thei meuh lo a, goal hmaah Alaves an hlauhawm zawk. Amaherawhchu minute 87-naah Barca-in mawi zetin Alaves tlarhnung an ṭhiat a, Jordi Alba ball vawrhluh chu Ferran Torres-a'n Frenkie de Jong tan siamsakin Dutch midfielder hian awlsam takin a khung.

International break avangin La Liga chawlh rih a ni dawn a, February 6, Pathianni zanah Barcelona-in an chung chiaha awm Atletico Madrid an mikhual dawn. Inkhel pawimawh bik a ni ang.

January 23, Pathianni
Granada 0 - 2 Osasuna
OSA : David Garcia 64'; Kike Garcia 89'
Real Madrid 2 - 2 Elche
RMA : Luka Modric 82' (P); Eder Militao 90+2'
ELC : Lucas Boye 42'; Pere Milla 76'
Real Sociedad 0 - 0 Getafe
Rayo Vallecano 0 - 1 Athletic Bilbao
BIL : Nico Sierrano 30'
Alaves 0 - 1 Barcelona
FCB : Frenkie de Jong 87'