South Africa 3-0 India

South Africa-in mikhual India chungah zahngaihna an lantir lo a, Test series-ah 2-1 a an hneh hnuin ODI-ah 3-0 in an sawp. ODI match hnuhnung ber hi Cape Town-ah Pathianni khan khelh a ni a, Proteas hian run liin hnehna an chang.

India-in vawm hmasak an thlang a, South Africa-in bat hmasain opener Quinton de Kock chuan 124 runs siamin ODI century vawi 17-na a ni a, Proteas-in 287 runs an siam. India tan target harsa ni mah se umphak theih a ni a, Shikhar Dhawan (61) leh Virat Kohli (65) te hmangin beiseina an nei sang hman lo.

Shreyas Iyer (26), Suryakumar Yadav (39) leh Deepak Chahar (54) te rawn chet ṭhat avangin chak turin India dinhmun a ṭha a, amaherawhchu 47.1 over-ah Chahar a thih avangin beiseina a thamral zui. India-in wicket hnuhnung pathum an hlohin five runs chauh an siam a, ball pali vawm tur a la awmin an thi fai vek a, run liin an vanduai.

India captain KL Rahul chuan, "Kan inenfiah a ṭul takzet. Batter-ten duh kan thlang sual hnem a, bowler-ten an tihtur an ti tawk lo," tiin insiamṭhat an mamawh thu a sawi. Men in Blue hian February 6 aṭangin West Indies nen ODI series an khel ṭan ang.