Bayern Munich an chak nuamsa

Bundesliga cham­pion lai Bayern Munich-in Pathianni zan khan Germany khawpui Berlin-ah Hertha Berlin an tlawh a, 4-1 in hnehna an chang. Bavarians hian point 49 an hmu a, khelh zat inangah an elpui Borussia Dortmund aiin point rukin an hmu tam zawk.

Olympiastadion Berlin-a inkhelah Bayern tan Corentin Tolisso, Thomas Muller, Leroy Sane leh Serge Gnabry ten goal khat ṭheuh an khung a, Hertha tana Jurgen Ekkelenkamp-a goal khung chu scoreline tih mawina chauh a ni.

Bavarians inkhel an thunun a, Tolisso-a'n minute 25-naa goal hma­hruai a tauh luh hnuah Thomas Muller-a'n Julian Nagelsmann-a hnuaia Bayern goal 100-na a khung. Second half-ah Berlin keeper pass sual chu Sane-a'n tlan chakna hmangin goal ruakah a khung.

Minute 79-naah Bayern tan Serge Gnabry-a'n goal lina a khung a, 4-0 a hma an hruai hnuah Dayot Upamecano back pass ṭhat tawk loh vangin Hertha tan Ekkelenkamp-a'n siphurh a sut ṭhen a, 4-1 in inkhel a tawp.

Bayern hian Nagel­smann-a hnuaiah Bun­desliga-ah goal 65 an khung tawh a, DFB-Pokal (12), DFL-Supercup (3) leh Champions League (22) a an khung nen tun season-ah goal 102 an khung tling tawh a ni.

Bundesliga inkhel dangah RB Leipzig-in Wolfsburg 2-0 in an hneh a, Willi Orban leh Josko Gvardiol ten goal an khung.

January 23, Pathianni
RB Leipzig 2 - 0 Wolfsburg
RBL : Willi Orban 76'; Josko Gvardiol 84'
Hertha Berlin 1 - 4 Bayern Munich
HER : Jurgen Ekkelenkamp 80'
BAY : Corentin Tolisso 25'; Thomas Muller 45'; Leroy Sane 75'; Serge Gnabry 79'