AFCON-ah Tunisia-in Nigeria an barakhaih

African Cup of Nations-ah Nigeria-in group stage-ah an khingpui hneh vek mah se last 16-ah Tunisia 1-0 in an hneh lo. Champion tura rinkai zinga mi Super Eagles chu knockout stage china tla hmasa ber an ni.

Augustine Eguavoen kaihhruai Nigeria-in beiseina sang tak nei mah se inkhel erawh an thunun thei lo. First half-ah Wilfred Ndidi-a bicycle kick leh Joe Aribo ball pet an dan sak te chu an chance neih ṭhat a ni.

Tunisia-in minute 47-naah Youssef Msakni hmangin goal an khung a, Tunisian forward hian box pawn aṭanga kawh zeta a pet chu Nigeria keeper Maduka Okoye-a'n a dang thei lo. Kum 22 mi Okoye-a'n a tih tur a ti tawk lo.

Nigerian inkhel tidanglam turin minute 59-naah Alex Iowbi an luhtir a, Everton midfielder hi minute 66-naah goal khungtu Msakni a tlawh avangin an hnawt chhuak. Super Eagles-in player 10 in an khel a, Tunisia tan goal venhim hna a awlsam sawt.

Inkhel dangah Burkina Faso leh Gabon ten hun pangngaiah 1-1 in an inhnehtawk a, penalty shootout-ah Burkina Faso 7-6 in an chak. Zanin hian last 16 khelh chhunzawm a ni dawn. Zanin dar 9:30-ah Senegal leh Cabo Verde te an inkhel ang a, zan lai dar 12:30-ah Morocco leh Malawi te an inkhel ang.

Last 16
January 23, Pathianni
Burkina Faso 1 - 1 Gabon
Penalty Shootout-ah Burkina Faso 7-6 in an chak
BUR : Bertrand Traore 28'
GAB : Adama Guira 90+1'(OG)
Nigeria 0 - 1 Tunisia
TUN : Youssef Msakni 47'
January 24, Thawhṭanni (Result hre hman lo)
Guinea 9:30 PM Gambia
Cameroon 12:30 AM Comoros
January 25, Thawhlehni
Senegal 9:30 PM Cabo Verde
Morocco 12:30 AM Malawi
January 26, Nilaini
Ivory Coast 9:30 PM Egypt
Mali 12:30 AM Equatorial Guinea