US Open Final ; Japan nula Osaka hmaah Serena Williams

Grand Slam vawi 23 champion tawh Serena Williams tan US Open final khelh hi thil thar a ni tawh lo, a khingpui tur Naomi Osaka erawhin major tournament final a vawi khat khelhna tur a ni thung. Zanin dar 1:30 hian Arthur Ashe Stadium-ah nomawi an inchuh ang.

1999 khan Serena-i'n a Grand Slam nomawi hmasa ber ni turin US Open-ah a champion, kha tih hunlai khan zanina a khingpui tur Osaka hi kum khat mi chauh a la ni; tunah chuan kum 20 mi a ni ve tawh. A tawi zawnga sawi chuan Osaka hi Serena inkhel ena seilian a ni a, 'Serena Fans' tam tak zinga pakhat a ni.

A ṭha pahnih
Boruak lum leh hnawng vangin player ṭhenkhat tan US Open khelh a harsa, nimin zingah erawh boruak a danglam. Ruah sur nasa vangin khawvela tennis stadium lian ber Arthur Ashe Stadium chu a chung khuhna hman a ngai.

Kum 36 mi Serena chuan darkar khat leh minute ruk chhung lekin seeded 19-na Anastasija Sevastova chu 6-3, 6-0 in a hneh a, tennis a khelh hun chhunga a vawi 31 nan Grand Slam final a khel dawn, US Open bikah hian a vawi kuana tur chiah a ni thung.

Semifinal inkhel pakhat zawkah Naomi Osaka chuan season hmasa finalist Madison Keys chu 6-2, 6-4 a hneh in a thleng ve bawk. Tun hmain Keys hi vawi thum a ngam lo tawh a, tun ṭumah erawh thawnthu a danglam. Japanese nula zingah Grand Slam final khel thei hmasa ber a ni dawn ta.

Japan nula
Japan rama khawpui lian tak pakhat Osaka-ah 16 October 1997 khan Japanese nu Tamaki Osaka leh Haitian pa Leonard San Francois te inkarah Naomi Osaka hi a piang. A nu te hnam chin dan phung angin 'Osaka' tih chu hmingah an chhawm, a unaunu Mari Osaka pawh tennis khel thiam tho niin; doubles huangah an inlan dun ṭhin.

Osaka unau hi an pianna ramah an awm rei lo, kum thum mi chauh an nih laiin New York-ah an pem; chumi hnuah tuna an chhungkaw chenna Florida an pan leh. US-ah seilian mah se an pianna ram erawh an theihnghilh lo, chawlh hmanga an kal ṭhin chungchang sawiin, "Chawlh hmanna nuam leh duhthusam" tiin Japan chungchang a sawi.

Ram pahnih - Japan leh US khua leh tui nihna nei Osaka hi a rualpui zingah tennis thiam fal nalh a ni a, mahse nomawi liantham chawi erawh a awlsam bik lo. Season tir lam khan Indian Wells-ah WTA title hmasa ber a la, a dawt chiahah Miami Open khel lehin; he inelnaah hian Serena Williams a hneh.

World number 20 Osaka tan Serena hi 'Idol' ni mah se hneh theih a ni a, tun inelna bikah hian match ruk a khelh zingah set khat chiah a la hloh avangin inrintawkna a nei sang - Serena lakah pawh chak lo zawk tura dah nghal ngawt tur chi a ni bik lo ang.

Nutling Serena
"Nikum tun ang hunah kha chuan damdawi inah ṭhat chhuah leh tumin hun ka hmang mek, engtik niah emaw chuan tennis court-ah ka lut leh ang tiin duhthu ka sam ṭhin. Ka tan chuan eng round pawh nise ka inkhel leh thei hi a lawmawm a, final luh phei chu a lawmawm zual," tiin Serena Williams chuan semifinal a paltlang hnuah a sawi.

Season hmasa khan nau pai vangin Serena-i'n US Open a khel lo, nikum September thla khan fanu Alexis Olympia a hring a, tunah chuan ṭha takin a khel leh thei tawh. Wimbledon final pawh a lut leh tawh, mahse German nula Angelique Kerber a ngam lo; US Open hi fa a neih hnua Grand Slam final a vawi hnih khelhna tur chiah a ni.

Seeded 17-na Serena chuan, "Final hi sawi lawk a harsa, rawn kir leh hlim ka nih avangin ka thawkrim hle. Ka inkhelah hmasawnna tur tam tak a la awm, a ṭhat dan ber kha ka la thlen loh avangin nomawi ka chawi ngei ang tih ka sawi thei lo, Osaka hi player chhuak thar ṭha tak a ni a, a thiam bakah a huaisen bawk," tiin final a thlirlawk.

Open Era chinah chuan Serena thlen chin apiang hi record thar a ni zel, khawvel tennis chanchin pumpui kan thlirlet erawh chuan Margaret Court hnungah a la awm. Australian hranghlui hian Grand Slam nomawi 24 a chawi a, tun ṭumah hian a champion thei a nih chuan Serena hian a nihrual chiah ang.

"I love you, Serena,"
Tennis player ropui tam tak an awm a, chung ziangah chuan Serena Williams hi player ropui bik a ni. A inkhel entu tam takin an ṭan rawn a, a thiamna leh teirei peihna chu player naupang zawk te entawn niin - coach tam takin an naute an fuihna a ni bawk.

Serena ngaisangtu zingah Osaka pawh a bang bik lo, Japanese player chuan, "Tun hma lama ka dai ngai loh ramah ka cheng mek, ka tan chuan thil thleng zawng zawng hi a hlu vek. A bik takin Serena hi ka player entawn leh ngaihsan a ni a, ani nena Grand Slam final khelh dun chu suangtuah phak bak thil a ni.

"Serena ka hmangaih che, mahse tunah chuan inkhel tur kan nih avangin hnehna ka chan theih nan theihtawp ka chhuah dawn a ni," tiin a sawi. Osaka hian a Idol hneh chungin nomawi a chawi a nih chuan a hlu zual ngei ang.

Inkhel Thlirna Tawi
Williams Stats Sevastova
4 Aces 1
1 Double Faults 2
29/45 (64%) First Serve % In 33/55 (60%)
22/29 (76%) Win % On 1st Serve 21/33 (64%)
8/16 (50%) Win % On 2nd Serve 4/22 (18%)
24/28 (86%) Net Points Won 3/6 (50%)
5/10 (50%) Break Points Won 1/2 (50%)
30/55 (55%) Receiving Points Won 15/45 (33%)
31 Winners 10
20 Unforced Errsors 12
60 Total Points Won 40

Inkhel Thlirna Tawi
Keys Stats Osaka
3 Aces 2
0 Double Faults 1
34/47 (72%) First Serve % In 60/86 (70%)
23/34 (68%) Win % On 1st Serve 38/60 (63%)
5/13 (38%) Win % On 2nd Serve 15/26 (58%)
3/8 (38%) Net Points Won 5/5 (100%)
0/13 (0%) Break Points Won 3/4 (75%)
33/86 (38%) Receiving Points Won 19/47 (40%)
23 Winners 12
32 Unforced Errsors 20
61 Total Points Won 72

US Open Mipa Final
Rafael Nadal, Novak Djokovic, Juan Martin del Potro leh Kei Nishikori ten semifinal an lut a, Pathianni zanah final khelh zui leh nghal tur a ni ang. Zirtawpni zan leh tukin zing hian semifinal khelh niin, world number 1 leh champion lai ni bawk Nadal leh 2009 US Open champion Del Potro an inkhel a, Serbian tlangval leh Japanese player te an intawng bawk - he thu buatsaih lai hian result kan hre hman lo.

Kumin US Open-ah hian 'Big Four' tia hming an pek - Roger Federer, Nadal, Djokovic leh Andy Murray te an inlan kim a, an zinga pahnihin final an lut; player ṭha dang rawn chhuak ṭhin mah se, set nga khelh a nih tawh chinah chuan anni el phak hi an la awm meuh lo.