Rossi-a'n Marquez a chibai duh lo

Pathianni tlai dar 5:30-ah San Marino Grand Prix tlan a ni dawn a, bike intlansiakna sang ber MotoGP an neih tur hi a boruak a sang dawn, tlan kawng Misano World Circuit Marco Simoncelli an luh hma aṭangin Valentino Rossi leh Marc Marquez te thawm a lian nghal hle.

Thuthar thehdarhtute an kawmnaah champion lai Mar­quez chuan Rossi chibai tumin a kut a phar chhuak a, mahse Italian rider hian a lo chibai duh lo. He thil thleng hian rider pahnih sulhnu tam tak a hrilhfiah nghal a, khawvela a ṭha ber nih duh pahnih an nih avangin media-te chaw tui ber an ni zui mek.

Rider pahnih in chibai duh loh chuangchang sawiin Jorge Lorenzo chuan, "Ka ngaihdan chuan an pahnih hian tih dik loh an nei. Rossi khan chibai duh ni se news hi a ṭha zawngin a thang chhuak nghal mai tur a ni a, tunah erawh a ṭha lo zawngin a ri leh ta zawk. Chibai duh loh kha chu naupang thil tih ni awm zawk tak a ni," tiin a sawi.

Yamaha bike khalhtu Rossi hian tun hmain Marquez hi inelna an neih laiin a tlawh tlu tawh. Tun season tir lam khan Grand Prix of Argentina tlan niin; Ducati rider hian tun hma lama amah ti tlu tawhtu Rossi hi a ti tlu let ve leh chiah a ni.

Argentina a thil thleng hi Rossi chuan na takin a dem a, "Bike khalh hlauhawm leh midang zahpah lo" tih hialin a sawisel tawh, mahse Spanish tlangval chuan he puhna hi a pawm bik lo, inelna chu thianghlim taka a kalpui thu leh, midang tih nat duhna thinlung a neih bik loh thu a sawi.

A thar leh ṭhin

Season chawhnu lam an hmang chho a, champion tur a la chian loh avangin a boruak a sang zel dawn. Hmahruaitu Marquez-a'n point 201 a hmu tawh a, amah chhaih buai phak an awm meuh lo; pahnihna chu point 142 neitu Rossi a ni.

San Marino Grand Prix chhiar telin season tawp hmain intlansiak pasarih a la awm dawn a, intlansiak pakhatah hnehna changtuin point 25 zel an la hmuh theih avangin an dinhmun hi nasa takin a la inthlakthleng thei.

Rider pahnih inkarah remna a awm dawn em? tih zawhna chhangin kum 39 mi Rossi chuan, "Marc nen kan inkarah buaina a awm lo a, chuvangin remna siam a ngaihna chhan ka hre lo," tiin a sawi.

Kum 25 mi Marquez chuan, "Rossi-a'n buaina a awm loh thu a sawi hi a lawmawm hle. Aman buaina a nei lo a nih chuan kei pawhin buaina ka nei bik lo, ka tlan danah thil ṭha lo lai a awm vak ka hre lo a, kei chu a dan pangngaiin theihtawp chhuahin ka tlan ang," tiin a sawi.