Mourinho ngaihtuahna a buai

Tottenham Hotspur manager Jose Mourinho chuan an league match hnuhnung bera 3-1 a Sheffield United an hneh loh chuan a rilru a tih buai thu a sawi a, "Ka ngaihdanah chuan keini aiin an rilru a paukhauh zawk a, chu chuan ka ngaihtuahna a tibuai em em a ni," a ti. 

Spurs hian tun hnai season liah Champions League an khel ziah a, tun hnai kum 11-ah parukna aia hniamah Premier League an khar ngai lo bawk - tunah erawh pakuana an ni mek a, an dinhmun a ṭha lo hle.

Mourinho chuan, "Sheffield nena kan inkhelah khan inkhelh chhan tur a tam hle. Top four hnaihna remchang kan nei a, Europa League khel tura kan ṭhut hmun rem fel theihna a ni bawk. Kha aia ṭha khan kan khel thei tih hre chunga kan khel ṭha lo a nih si chuan ngaihtuahna a buai lo thei lo a ni," a ti. 

Porto, Chelsea, Inter Milan leh Real Madrid a enkawl laia hlawhtlinna ropui tak tak lo chang tawh Mourinho hian November khan Mauricio Pochettino thlakin Spurs a enkawl ṭan a, engkim thlak danglam tur chuan hun a mamawh thu a sawi. Kum 57 mi coach chuan, "Football-a thil harsa ber chu rilru puthmang inthlaksak hi a ni a, team pumpui thinlung thlak hlawk a ngai ṭhin - chu chu a harsa em em thung si. "A chang chuan player ṭha tak tak, awlsam taka i duh anga an rilru thlak mai thei i nei a, a chang chuan player ṭha tak tak, mahse rilru paukhauh nei tura hun mamawh bik an awm ṭhin. Chutianga kan mamawh ber chu hun a ni a, hun chauhin min pui thei," a ti. Tottenham hian zanin dar 12:30-ah Premier League match an khel chhunzawm leh dawn a, Everton an mikhual dawn avangin an hna hi a awlsam lo ang.