Germany leh France inkhelah chak zawk awm lo
UEFA Nations League hmasa berah kum 2014 World Cup champion Germany leh 2018 champion France an intawng a, inkhel hmuhnawm tura beiseiah goal lut loin an inhnehtawk.
France hian Pathianni zan dar 12:15-ah Netherlands an tawng leh dawn a, an inhmachhawnna tur hi Nations League tho a ni. Germany hi Pathianni zan dar 12:15-ah an inlan leh dawn bawk a, Die Mannschaft hian friendly match-ah Peru an hmachhawn ang.
Hetihlai hian Ryan Giggs enkawl Wales-in British derby-ah hnehna chang turin harsatna an tawk lo a, Republic of Ireland chu 4-1 in an sawp.
Cristiano Ronaldo tel loa inkhel Portugal-in World Cup finalist Croatia lakah si phur hmasa mah se Pepe hmangin an si phurh an sut a, 1-1 in an inhnehtawk.
Goal luh lohna
France-in malpui hliam vangin first choice goalkeeper leh captain ni bawk Hugo Lloris an chhawr thei lo a, a thachhang dawltu Steve Mandanda chu hliam vangin a inlan thei lo bawk - an aiawh hian ram tana la inlan ngai lo Alphonse Areola chuan si ban a nghak.
Mahse, Paris Saint-Germain goalkeeper hian ram tana a match hmasa berah a theihna a pholang nghal - Marco Reus, Matthias Ginter leh Mats Hummels pet goal tur nia lang chu ṭha zetin a dan sak.
France coach Didier Deschamps-a'n World Cup final-a a starting XI ngai a hmang a, goalkeeper Areola chu World Cup final-a bul ṭan lo, Germany laka bul ṭan awmchhun a ni. Atletico Madrid forward Antoine Griezmann chu dan pangngaiin a khel ṭha a, a hun neih ṭhat erawh Manuel Neuer fakna mai a ni.
Germany tan World Cup-a beisei phak lo, RB Leipzig forward Timo Werner a khel ṭha a, World Cup-a hruai loh Manchester City winger Leroy Sane chu minute 83-naah tlan luhtir a ni a, hun a neih tlem miau avangin danglamna a thlen hman lo.
Wales an ṭha
World Cup khel phak lo Wales-in Ryan Giggs hoin an insiamṭha tih an pholang a, Manchester United legend hnuaia an competitive match hmasa berah Republic of Ireland chu 4-1 in an sawp.
Wales tan Tom Lawrence, Gareth Bale, Aaron Ramsey leh Connor Roberts ten goal khat ṭheuh an khung a, Ramsey tihsual nangchinga Ireland tana substitute Shaun Williams goal khung chu mualpho lutuk tur khuhna chauh a ni tawh.
Season duhawm tak hmang mek Bale-a'n ram tan pawh a khelh ṭhat a chhunzawm zel a, goal a khung chiah khan Wales tana goal 30 khung tling thei hmasa ber a ni - heti zat goal khung tur hian match 71 a mamawh a, amah hnaih bertu Ian Rush hian match 73-ah goal 28 a khung.
Giggs-a'n tawnhriat ngah leh player naupang rual a hman pawlh a, a tifuh hle. Kum 17 mi Chelsea midfielder Ethan Ampadu a che ṭha a, kum 22 mi Swansea right back Connor Roberts lam hmaih theih a ni lo bawk.
Ronaldo tel lohna
Ram langsar ṭhenkhatin UEFA Nations League an khelh laiin friendly match khel pawh an awm tho a, Ronaldo tel loin Portugal chuan international friendly match-ah Croatia mikhualin 1-1 in an inhnehtawk.
Juventus forward hian international break-a ram tana inlan turin a in fit tawk lo niin a sawi a, hei vang hian chawlh peka ni. Hetihlai hian Porto attacking midfielder Sergio Oliveira leh Benfica midfielder, kum 19 mi Gedson Fernandes te chuan ram tana an match hmasa ber an khel thung.
Inkhel ṭan aṭanga minute 18-na lekah Croatia tan Ivan Perisic chuan hnai set sawt
aṭangin a volley lut a, Portugal an mualpho dawn niin a lang. Mahse, Pepe chuan minute 32-naah an si phurh hi sutin chak zawk awm loin an inṭhen.
World Cup zawh hnuah goalkeeper Danijel Subasic leh striker Mario Mandzukic ten ram tana inkhelh an chawlhsan thu an puan avangin an inlan lo a, Luka Modric inlan mah se World Cup-a a kawppui fuh em em midfielder Ivan Rakitic chu chawlh hahdam tir a ni thung.
Inkhel Result
International Friendly
Austria 2 - 0 Sweden
Netherlands 2 - 1 Peru
Portugal 1 - 1 Croatia
UEFA Nations League
League A
Germany 0 - 0 France
League B
Czech Republic 1 - 2 Ukraine
Wales 4 - 1 Republic of Ireland
September 8, Inrinni
International Friendly
USA 05:00 AM Brazil
Mexico 07:00 AM Uruguay
UEFA Nations League
Switzerland 09:30 PM Iceland
England 12:15 AM Spain
September 9, Pathianni
International Friendly
Germany 12:15 AM Peru
UEFA Nations League
League A
France 12:15 AM Netherlands
League B
Ukraine 06:30 PM Slovakia
Denmark 09:30 PM Wales