Ram tana inkhelh chawlhsan Sneijder

Netherlands attacking midfielder Wesley Sneijder chuan ram tana inkhelh a chawlhsan ta a, Ningani zan khan Dutch team tana a match hnuhnung ber hi khelin Peru chu 2-1 in an hneh.

Mikhual team tan Pedro Aquino chuan minute 13-na lekah goal hmahruai khung mah se, Manchester United forward Memphis Depay chuan second half-ah goal hnihin a chhanglet a, mualneitu team hi 2-1 in an chak.

Minute 62-naah Sneijder hi lakchhuah a ni a, 'Wesley, kan lawm e,' tiin fans an au rual a, Netherlands kawr ha chunga Sneijder career chu a tawp ta.

Netherlands tan match 134 khela an ram tana inlan hnem ber record neitu Sneijder chuan, "Netherlands kawr ka hak tawp hun chu a lo thleng ta a, tunah chuan a tawp ve ta. Engkim hian tawp hun a nei a ni," tiin ram tana inkhelh chawlhsan a hun tawh thu a sawi.

Johan Cruyff Arena-a inkhelh zawhah hian khelmual laiah ṭhutna siamchawp niin Sneijder hi a chhungte nen an ṭhu a, an hmaa TV inchhawpah ram tana a inkhelhpui ṭhin a ṭhianten an thlahna thu chu a en a ni.

Kum 34 mi attacking midfielder hian Qatar club Al-Gharafa tan khel mekin club football erawh a la chawlhsan dawn lo a, Qatar a pan hma hian Ajax, Real Madrid, Inter Milan, Galatasaray leh Nice tan a lo khel tawh bawk.

Netherlands tan 2003 khan a match hmasa ber khelin kum 2010 World Cup-ah khan final luhpuiin player ṭangkai a ni a, kum 2014 World Cup-ah khan pathumna a nihpui.