Mexican club enkawl tur Maradona

Argentine legend Diego Maradona chuan hna thar a nei leh ta. Maradona hian Mexican second division club Dorados de Sinaloa a enkawl dawn.

Kum 57 mi Maradona hi player a nih lai chuan midang chunga leng a ni. Ram tan 1977-1994 chhung khan match 91 a khel hman a, a ropui em chhan pawh 1986 World Cup-ah an ram a champion pui vang a ni.

Club lamah pawh Argentinos Juniors, Boca Juniors, Barcelona leh Napoli tan khelin a hming a chher hle, mahse team enkawl lamah erawh sulhnu ropui tak tia sawi tur a nei bik lo. A enkawl hnuhnun ber chu United Arab Emirates club Al-Fujairah niin, kumin April thla khan an inṭhen.

Mexican media ten an tarlan dan chuan Maradona hian Francisco Gamez a thlak dawn, Gamez hi Ningani khan a hna aṭanga ban a ni a, ni khat hnu lekah amah thlaktu tur hi an tifel zui nghal.

Mardona enkawl tur Dorados hi 2003-a din chauh kha a ni a, Manchester City boss Pep Guardiola hi player a nih lai, 2006 khan thla ruk chhung a lo khel tawh a ni.