Spurs hmaah Chelsea-in an theihna an pholang

Chelsea leh Thomas Tuchel ring lotu an pung chho a, German manager hnuaiah London club an hnung tawlh meka a lan laiin Tottenham Hotspur lakah an theihna tak an pholang. Pathianni zan khan Blues-in Antonio Conte hnuaia Premier League-a hneh loh an la tawng lo Spurs an mikhual a, 2-0 in an hneh.

Stamford Bridge-a inkhelah Hakim Ziyech-a'n second half ṭantirhah goal mawi bik a khung a, Brazilian veteran defender Thiago Silva-a'n a khung belh leh bawk. Chelsea-in an elpui Spurs an hneh avangin pathumna dinhmun an hauh a, an chunga awm Liverpool an phak lohna chu point khat chauh niin champion beiseina an chhi nung lehah a ngaih theih bawk.

Goal mawi bik
First half-ah goal chance mumal tak a awm lo a, chutihrualin inkhel hmuhnawm a ni pha tho. Romelu Lukaku-a'n ṭan phatah a pet over nghal a, box pawn aṭanga Ziyech-a ball pet keeper Hugo Lloris-a'n a dansak. Spurs pawhin chance an nei a, Harry Kane-a'n goal khungah inngai mah se hun thawl a neih theih nana amah vengtu Thiago Silva a nam avangin pawm a ni lo.

Second half ṭan chiahah Callum Hudson Odoi-a'n vei lam kil aṭanga ball la lutin box pawna awm Hakim Ziyech a pe a, Moroccan midfielder Ziyech hian goal kilah tak a hlai lut. Spurs keeper Lloris tan en liam mai loh chu tih theih dang a awm lo.

Chelsea leh Ziyech an hmuhnawm zui a, Lloris-a'n Ziyech-a goal hnihna tur erawh a dansak. Minute 55-naah Mason Mount-a freekick pet chu Silva-a'n a tauh goal a, 2-0 a nih tak avangin Chelsea-in harsatna lian tham an tawk zui lo.

Chutihrualin Spurs striker Kane-a'n keeper Kepa Arrizabalaga tan hna a siamsak a, Leicester City laka injury time-a goal hnih khungtu Steven Bergwijn erawhin a chet ṭhat a chhunzawm thei lo.

Hattrick
Thomas Tuchel-a'n nikum January thlaa Chelsea a enkawl ṭantirh khan Premier League-a manager thawm nei ring ber Pep Guardiola leh a hote chu ṭum thum Premier League, FA Cup semifinal leh Champions League final-ah a hneh vek.

Tun season-ah Conte-a'n thawm a nei ring a, Italian manager hnuaiah Spurs-in league-ah hneh loh tawng lo mah se Tuchel lakah erawh an zawr chiang hle. Tuchel-a enkawl Chelsea hian Conte kaihhruai Spurs hi League Cup semfinal first leg leh second leg-ah a hneh ve ve a, Premier League-ah hneh leh bawkin kar thum chhungin vawi thum a hneh a ni.

Manager thlirna
Chelsea boss Thomas Tuchel chuan, "Kan rilru put hmang a dik a, hun thawl kan neih avangin inkhel turin kan inpeih. Halftime-ah pawh thu tam kan inhrilh lo a, tih tur hrilh tam loin ka fuih phur zawk. Hnehna kan chan avangin kan lawm hle," tiin a sawi a, goal khungtu Hakim Ziyech a fak bawk.

Spurs manager Antonio Conte chuan, "Chak loh ka duh lo a, chuvangin chak loh hi hrehawm ka ti ṭhin. Kan chak zawh loh avangin team lian zawk nen kan inkar a zau ta hle," tiin a sawi a, chak zo lo mah se a naute khelh danah a lungawi thu a sawi tel bawk.

January 23, Pathianni
Arsenal 0 - 0 Burnley
Crystal Palace 1 - 3 Liverpool
CRY : Odsonne Edouard 55'
LIV : Virgil van Dijk 8'; Alex Oxlade-Chamberlain 32'; Fabinho 89' (P)
Leicester City 1 - 1 Brighton & Hove Albion
LFC : Patson Daka 46'
BRI : Danny Welbeck 82'
Chelsea 2 - 0 Tottenham Hotspur
CHE : Hakim Ziyech 47'; Thiago Silva 55'