Referee lakah Vieira a thinur

Crystal Palace-in Pathianni zan khan Liverpool an mikhual a, 3-1 in an hneh lo. Reds-in first half-ah Virgil van Dijk leh Alex Oxlade-Chamberlain te hmangin goal an khung a, Eagles-in Odsonne Edouard hmanga siphurh an sut ṭhen avangin inkhel boruak a ṭang. Amaherawhchu hun tawp dawn hnaiah Diogo Jota-a'n sawisel kai takin penalty a hlawh chhuak a, Fabinho-a'n goal-ah a chantir avangin Eagles tan thawhchhuah ngaihna a awm ta lo.

Selhurst Park-ah Liverpool-in inkhel chawhma lam thunun mah se Patrick Vieira hoten second half-ah na takin an nawr let a, inkhel a nung ṭha hle. Minute 86-naah Trent Alexander-Arnold through ball ṭha chu Jota-a'n um lutin holam takin a pet out a, a petchhuah hnuah keeper Vicente Guaita-a'n a rawn nam.

Thil thlen dan hi VAR hmanga ennawn a nih hnuah referee Kevin Friend-a'n mualsira monitor-ah en lehin penalty a pe a, mak a tih a hlawh hle. Kum 45 mi Vieira chuan, "Thutluknaah khan ka thinur takzet. Vawi tam ka ennawn a, penalty tur a ni lo. Thutlukna dik lo hul hual a ni a, referee thutlukna khan inkhel result-ah nghawng lian tak a nei. Kan tan khan draw beiseina a la awm a, amaherawhchu referee-in min tihtawpsak," tiin a lungawi hle.

Liverpool erawhin point thum hlu tak an hlawhchhuak a, Mohamed Salah leh Sadio Mane te awm lo mah se goal khung an harsat phah lo. Reds hian point 48 an hmu a, hmahruaitu Man City point kuain pha lo mah se match khatin an khel tlem.

German manager Jurgen Klopp chuan, "Man City umphak lam kan sawi a la rem lo, kan inkar a zau mah mah. Kan khelh hmabak zel chak hi kan tih tur a ni a, season tawp lamah kan dinhun chu a hriat ang," tiin a sawi.