Goal khung harsat Arsenal

Arsenal chuan Premier League-a palina nih theihna remchang an neih an bawhpelh. Pathianni zana Gunners chelhtu hi tu dang ni loin table mawngphah Burnley an ni. Inelna hrang hrang match hnuhnung panga aṭanga goal khat chauh khung Mikel Arteta leh a hoten goal khung an zir ṭhat leh a ngai.

Emirates Stadium-a hun remchang nei ṭha ber chu Alexandre Lacazette a ni. Mahse, rawlthar Emile Smith Rowe-a'n harsa taka a thawh chhuah sa chu Lacazette hian goal zawnah a pet thei lo. Smith Rowe khung tur dansaktu Burnley keeper Nick Pope a fakawm bawk.

Gunners an vannei tawk lo a, chutih rualin Pope chet ṭhat zan an tawng ve bawk. English keeper hian rang leh ṭha zetin Martin Odegaard a khung tur pawh a dansak thei a, tun hnaiah a zawna match thum chhung tlawm tawh Burnley chu point a hlawh chhuahpui.

North London club erawhin kum 2022 chinah an ke an la chhep fuh hleithei lo, tun hnaiah inelna hrang hranga an match hnuhnung pangaah chak ni hmel an hmu miah lo; season thara Champions League khelh a harsa dawn.

Arteta chuan, "Team lian dangte nena inel phak nih kan duh chuan tun ṭuma match kan khelh angah khan kan chak a ngai. Bul kan ṭan fuh tawk lo a, kan chet ran loh bakah kan tlan tam tawk lo ni pawhin a lang.

"Hun tawp hma minute 20 chhung vel kha chuan kan che na viau, amaherawhchu a tir aṭangin khatiang khan ti thei ni ila kawng ro a su zawk ngei ang," tiin a naute khelh dan a duhkhawp loh thu a sawi a, player chhawr tur a neih tlem avangin an ṭha tawk lo tih a lang bawk.

Granit Xhaka leh Thomas Partey ten an match hmasa lamah ṭul lo taka red card an hmuh avangin an inlan thei lo. African Cup of Nations khelh vangin Mohamed Elneny a awm lo bawk - kum 22 mi Albert Sambi Lokonga-a'n midfield a luah lum zo lo.

Premier League table-ah Arsenal hi parukna an ni mek, palina Manchester United an phak lohna chu point hnih niin, Gunners hi match khatin an khel tlem thung. Inelna dang khelh tur an neih tawh loh avangin palina nih phak chu an tum ber tur a ni tawh ang.