Fiahna paltlangtu Medvedev

Daniil Medvedev chuan Australian Open champion ni thei turin a ṭha tawk tih a lantir zel. Russian tlangval hian nimin last 16 inkhelah Maxime Cressy chu 6-2, 7-6 (7-4), 6-7 (4-7), 7-5 a hnehin quarterfinal a inhlangkai.

Australia ramah chuan nipui lai a ni a, nimin pawh khan 32C te a nih avangin Europe khawvawt lama khawsa ṭhangte tan chuan a lum hle. A bik takin Russia phei chu ram vawt a nih avangin Medvedev tan Melbourne Park chu a lum takzet.

World number 2 hian a duh ang takin inkhel a thunun thei bik lo, point hnuhnung ber hmu tur hian break point vawi kua a hmuhna a chhawr ṭangkai thei chauh a, set li khel ni mah se match hautak leh harsa a paltlang tia sawi ngam a ni.

Kum 25 mi Medvedev hi player chhuak thar zinga beisei awm a ni, a bik takin hard court-ah a inkhel thiam. Season hmasa pawh khan US Open final-ah Novak Djokovic a lo ngam tawh, tun ṭumah hian champion tura rinkai a ni.

Hnehna a chan hnuah Medvedev chuan, "Darkar thum leh a chanve chhungin set li kan khel, inkhel harsa tak chu a ni. A bik takin set lina kha a awlsam lo hle, break point ka hmuh chiah khan a hma aia ṭhain a rawn service thei zel.

"Cressy-a ball vuak kha a na hle, aces a siam zat aṭangin chu chu a chiang. Line bul lawk lawkah a vaw thei a, ka tan chuan vuak let a harsa ṭhin, amaherawhchu theihtawp ka chhuah ve miau avangin a tawpah ka chak," a ti.

January 26, Nilainiah Medvedev hian quarterfinal a khel zui leh dawn, seeded pakuana Felix Auger-Aliassime nen an inhmachawn ang. Canadian star hian service nei ṭha leh US Open champion hlui ni bawk Marin Cilic chu 2-6, 7-6 (9-7), 6-2, 7-6 (7-4) in a lo hneh ve bawk.

Nimin inkhel dangah Jannik Sinner-a'n quarterfinal lut turin harsatna a tawk lem lo. Italian player hian Rod Laver Arena-ah Alex de Minaur chu 7-6 (7-3), 6-3, 6-4 in a hneh a, world number 3 Stefanos Tsitsipas leh Taylor Fritz inkhela chak zawk a hmachhawn leh ang.

Australian Open-ah hian Roger Federer leh Novak Djokovic te an inlan lo a, mipa player zingah Rafael Nadal chauh champion hlui a awm. Spanish star hian vawiin chawhma lamah quarterfinal match hmasa a khel dawn, seeded 14-na Denis Shapovalov nan an inhmachhawn dawn a ni.