Juventus leh AC Milan inhnehtawk
Serie A champion tum AC Milan chu an mikhual Juventus nen 0-0 in an inhnehtawk a, champion lai leh hmahruai mektu Inter Milan tan chuan a elpui pahnih ten point an hloh ve ve hi result lawmawm a ni ang.
Pathianni zan inkhel dangah AS Roma leh Napoli te chuan goal li ve ve khungin an khingpui an hneh thung a, nomawi inchuh leh Champions League khelh phak tuma inum boruak a nung chho hle.
A goal lo
Team pahnih te hian hliam, hrem leh Africa Cup of Nations khelh vangin player an chan ve ve a, an ṭhat dan berin an khel thei lo tih chu thil chiangsa a ni; chutih rualin Italian club lian pahnih intawng an nih miau avangin a boruak a nep thei lo.
Spezia laka tlawm hlim Milan lamin chak an tum ruh. Mahse, minute 28-na lekah Zlatan Ibrahimovic chu hliam vanga thlak a ni a, an tum angin an khel thei lo - Ibra thlaktu Olivier Giroud khel chhe lo mah se goal hmaah a hriam tawk lo a ni.
Old Lady striker Alvaro Morata pawhin remchang chu a hmu. Amaherawhchu Spanish striker hian goal zawnah a pet lo, forward Federico Chiesa tel loa khel Juve goal nawr a na tawk lo. San Siro aṭanga point khat an hawn hi an tan thil lawmawm a ni ang.
Pioli a zam lo
AC Milan manager Stefano Pioli chuan point thum hlawh chhuak zo lo mah se 'Scudetto' lak chu an thil tum ber a la nih thu a sawi. An hmelma ai hian match khatin an khel hnem a, point liin an hniam mek bawk.
Pioli chuan, "Kan khelh thiam dan takin ball pawh kan chang tam, mahse penalty area chhunga kan chet dan a hriam tawk loh avanga point thum hmu lo mai kan ni. Juventus kha hun remchang insiam thei lo khawpin kan dang chat.
"Ibra hliam kha a pawi, striker ṭha a nih bakah player dangte tan hruaitu a nih bawk avangin channa nasa tak a tling," a ti. International break a awm zui dawn, an lo kir leh hunah chuan Inter Milan nen Milan Derby an khel nghal ang.
Allegri a lawm
Serie A table-a pangana ni mah se Massimiliano Allegri chuan an dinhmunah a lungawi thu a sawi a, team ṭha Milan nen an inhnehtawk pawh chu result lawmawm a nih thu a sawi - club thuenitu leh fans ṭhenkhat chuan an pawmpui lo mai thei.
Italian manager chuan, "Season bul kan ṭan fuh lo em em a, mahse tunah chuan Milan nen kan inkarah point sarih chiah a awm. Duhthusam ang vekin thil thleng lo mah se kan kan chantawkah kan lungawi a ngai," tiin a sawi.
Old Lady-in Allegri an laklet chhan kha Serie A chauh ni loin Champions League nomawi an duh vang a ni. Tunah erawh nomawi an sawi ngam lo a, season tharah UCL khelh phak chu an thupui pakhat a ni mek.
Goal khung thiam
Jose Mourinho naute hi hriatthiam an harsa, an khelh fuh leh fuh loh ni a inthlau thei hle. AS Roma hian Empoli 4-2 in an luhchhuah a, chawlhlawk hmain goal li an khung fel der tawh - a hnu lamah goal hnih chhuah ve mah se point thum an hmu tho.
Roma tan Tammy Abraham-a'n goal hnih a khung a, ani bakah hian Sergio Oliveira leh Nicolo Zaniolo ten goal khat ve ve an thawh bawk, parukna Roma hian palina Atalanta an phak lohna point nga a ni, match khata an khelh tam bawk avangin UCL khel phak tur chuan ṭan mar an ngai hle.
Inkhel dangah Napoli chuan Juan Jesus, Dries Mertens, Amir Rrahmani leh Lorenzo Insigne te goal khat ṭheuh hmangin Salernitana 4-1 in an sawp. Naples khaw club hi pahnihnaah an in vawrh kai laiin chak lo team erawh a mawngphah luahtu an ni chhunzawm.
Italy - Serie A
Cagliari 1 - 1 Fiorentina
Napoli 4 - 1 Salernitana
Spezia 1 - 0 Sampdoria
Torino 1 - 1 Sassuolo
Empoli 2 - 4 AS Roma
AC Milan 0 - 0 Juventus