Sindhu-i'n title vaw chhuak

Hun rei tak chhung nomawi a chawi hleih­theih loh hnuah PV Sindhu chuan hlawhtlinna a chang ve leh ta. India nula badminton khel thiam hian Pathianni zan khan Malvika Bansod hnehin Syed Modi India International badminton tournament-ah a champion.

Seeded pasarihna Sindhu hi champion tura rinkai zinga mi a ni a, mahse tun hnaiah beisei a phak loh deuh ṭhin avangin rin ngam a harsa. Tun inelna bikah erawh chet buai a nei lo, final-ah pawh game hloh loin 21-13, 21-16 in hnehna a chang.

Olympic medal vawi hnih dawng tawh Sindhu chuan, "Dawhthei taka nghah a ngaih chang a awm ṭhin. Engtik niah emaw chuan ka la cham­pion ve leh ngei ang tih hi ka beisei tlat ṭhin a, tunah chuan a takin a lo thleng leh ta," tiin a sawi.

Mipa singles lamah France tlangval pahnih Arnaud Merkle leh Lucas Claerbout ten final khel tur an ni a, mahse Merkle zawkin Covid-19 a lo kai avangin an khel thei lo a, champion an awm lo.