PSG tan Ramos-a'n goal a khung

Sergio Ramos chuan Paris St-Germain tana a goal hmasa ber a khung a, a club thar hi Reims lakah 4-0 a hnehna chan puiin Paris club hian Ligue 1 roreltu an nihna an chhawm nung zel.

Pathianni zan inkhelah PSG tana Ramos inlan thei hi a lawmawm, an lawmna belhchhah turin Lionel Messi chu bench aṭangin khelmual chhungah a lut thei leh tawh bawk - Neymar erawhin inkhel turin hun a la mamawh deuh.

Mauricio Pochettino naute hian inkhel an thunun a, goal nei tur erawhin an nghak rei. Chawlhlawk hma chiahin Marco Verratti-a'n goal hmahruai a khung, kum 2017 hnu lamah league goal a khung lehna hmasa a ni hial.

Chawlhlawk hnuah Ramos-a'n khung belhin Wout Faes chuan anmahni lamah a ti lut a, forward Kylian Mbappe thawhrah sengtu Danilo chuan an goal lina leh chak nemnghehna ni bawk chu a khung ve bawk.

PSG manager Poch chuan, "Khel ṭha viau mah ila Reims kha an inveng rei thei hle, a tawpah erawh goal li lai kan neih avangin kan khel ṭha tawk tih a chiang, a chang hi chuan dawhthei taka kan nghah a ngaih chang hi a awm ṭhin.

"Goal chhuah loa hnehna chan theih kha duhthusam a ni a, goal khung hnem mah ila keimahni lama a luh hnem chuan a famkim lo deuh ṭhin. Tun ṭumah erawh engkim mai kha a ṭha zawngin a kal vek," tiin a sawi.

Tun hnaiah PSG hian league match 13 chhung chu tlawm an nei ta lo. Ligue 1 match 22 aṭanga point 53 hmuin hma an hruai fal hle a, anmahni hnaih bertu Nice chuan khelh zat inangah point 42 an hmu ve tawh thung.